Velkomin til Ánastaða

Teljum niður

2011-06-03T21:07:00.004Z

Heil og sæl verið þið

Í dag eru 3 vikur þar til ég mun stíga fæti á íslenska grund á ný. Hver kannast ekki við að nefna við einhvern að það sé svo og svo langur tími þar til eitthvað gerist, að þá svarar viðmælandi alltaf "isss, það verður enga stund að líða". En ég fór að pæla í því að 3 vikur eru nú þónokkur tími, og það er líklega hægt að afreka heilmargt á 3 vikum ef maður vildi:

Árið 1967 háðu Ísraelar stríð gegn Egyptalandi, Jórdaníu og Sýrlandi, og fékk það stríð nafnið 6 daga stríðið. Það væri því hægt að fara í 3 stríð gegn einhverjum af þessum þjóðum og samt geta tekið kraftmikla 3 daga helgi eftir það, allt á 3 vikum.
Einhverjir sjálfshjálparsnillingar segja að það taki 21 dag að venja sig af einhverju sem maður gerir reglubundið, t.d. að byrja daginn alltaf á því að fá sér kaffi. Mér dettur bara ekkert í hug sem ég þarf að venja mig af.
Sköpun jarðar á að hafa tekið 7 daga, er ekki alltaf verið að tala um að við lifum svo ósjálfbært að það þyrfti fleiri jarðir undir okkur. Áhugasamir gætu tekið sig til og búið til 3 aukajarðir á þessum tíma (væri líklega fínt að henda krötunum öllum bara á eina þeirra).
Eftir því sem ég best veit lifir húsfluga í 2 vikur. Þegar ég kem til Íslands verður húsfluga sem fæddist í dag því löngu dauð og afkomendur hennar allir meira en hálfnaðir með sitt æviskeið.

En þetta var nú bara smávegis útúrdúr. Annars er nú ólíku saman að jafna prófatörninni hér eða í Budapest. Á meðan hún var rúmur mánuðir austan járntjaldsins þá nenna nú Danirnir ekki að hafa þetta meira en viku, og því eru ennþá 2 vikur í að ég byrji í prófum. Að vísu kemur þetta á sama stað niður því þeir kenna bara lengur. Svo verð ég að viðurkenna að á þessum tímapunkti finnst mér þetta vikufrí sem eru tekið í Danmörku í marsmánuði vera hálf tilgangslaust, nær væri að hætta viku fyrr. En sumarfrí skólafólks á Íslandi þykja víst í lengra lagi.

Svo bíður Magnús Magnússon frá Þverá með þrælapískinn kláran þegar ég kem til landsins. Get nú eiginlega ekki beðið eftir því að komast upp á þak og hvíla höfuðið og fara að vinna eitthvað með bakinu.

Svona rétt í lokin fyrir ykkur sem dásamið hita og teljið það veðursæld, í 25 stiga hitanum og skordýraplágunni í dag hefði ég alveg verið til í að fá svellkalda norðanátt beint frá heimsskautinu.

Þar til síðar

Met er fallið

2011-05-06T19:28:00.000Z

Gott föstudagskvöld kæru vinir

Já á þriðjudaginn síðastliðinn þá sló ég persónulegt met, en þá hafði ég verið samfellt 117 daga í burtu frá Íslandinu fagra. Eldra metið átti ég frá haustönninni í Budapest. Með hverjum deginum sem líður nú eyk ég við metið, en heimkoma er nú áætluð að kvöldi 24. júní, sléttar 7 vikur er þetta er skrifað. Það eru auðvitað töluverð vonbrigði að ná ekki að koma heim á Jónsmessunótt, en svona er þetta bara stundum.

Orðið mjög langt síðan ég setti eitthvað hér inn. Aðalástæðan fyrir því er sú að ég, í félagi við Eyfirðinginn Gunnfríði Elínu Hreiðarsdóttur og Dalamanninn Eyjólf Ingva Bjarnason hef unnið að því í nokkurn tíma núna að koma á fót veftímariti um landbúnaðarmál. Þessi útgáfumál munu líklega eiga hug minn og hjarta næstu mánuðina. Verður áhugavert að sjá hvernig þetta mun koma út.

Ég er ekki viss um að það hafi komið neitt vor hér í Danmörku. Það stökk bara beint úr 0-5 gráðum í 15-20 stig, sem getur orðið svakalegt á köflum fyrir mann eins og mig, kemur fyrir að ég svitna við það eitt að hugsa. Það segir kannski meira um hvað gengur á inn í höfðinu á mér heldur en veðurfarið. Á svona fallegu föstudagskvöldi eins og er nú á Sjálandi fæ ég gríðarlega löngun til þess að taka rúnt á Höfðingjanum, t.d. fram í þá fallegu hlíð, Blönduhlíð.

Annars erum ég og umboðsmaðurinn minn, Magnús Magnússon frá Þverá, nú betur þekktur sem Agent Momo Jr. farnir að skipuleggja sumarið. Óhætt er að segja að ég verði undir skónum á Agent Momo kvölds og morgna. Ekki nóg með að hann verði sami helvítis þrælahaldarinn upp á þaki í pappanum, þá verður hann líka einkaþjálfarinn minn í sumar. Mun Momo sjá um tæknilegar æfingar tengdar körfubolta, leikskilning og þess háttar. Honum til halds og traust verður frændi hans, Stefán Steinþórsson, nú þekktur sem Silvio "Mr. Big" Giancana. Mr. Big mun sjá um og bera ábyrgð á líkamlegu atgervi mínu eftir sumarið. Þetta verður gott sumar.

Lifið heil að sinni.

Með á nótunum

2011-03-01T14:25:00.001Z

Góðan og blessaðan daginn

Það er líklega kominn tími til að ég segi stutta sögu sem ég hef ekki sagt neinum. Það er reyndar ekki alveg dagsatt því ég missti þetta út úr mér við Blöndhlíðinginn Friðrik Hreinsson síðasta vetur, en hvað um það.

Árið 2007 var nýgengið í garð. Við Skallagrímsmenn höfðum farið í jólafríið efstir í töflunni, reyndar glutruðum við því niður minnir mig með því að tapa svo á milli jóla og nýárs. En engu að síður gaf það fögur fyrirheit að fyrsti leikur á nýju ári, sem var gegn Keflavík í Fjósinu, yrði jafn og spennandi. Þetta þótti meira að segja það athyglisverð viðureign að sjónvarp allra landsmanna hafði boðað komu sína, og eftirvæntingin því mikil.

Í jólafríinu hafði ég tekið að mér að fara nokkrar ferðir á mjólkurbílnum til að drýgja tekjurnar. Þetta þýddi auðvitað að það þyrfti að vakna snemma, og svo gerði nú snjókomu einhverja daga þannig að stundum urðu dagarnir heldur langir og lýjandi. Síðasta mjólkurferðin var á föstudegi og leikurinn á laugardegi. Ég var alveg sérstaklega lúinn eftir ferðina, kom beint á æfingu og Vignir, sem tók við af mér í akstrinum tók bílinn heim. Ég held að ég hafi sjaldan verið eins búinn eftir æfingu og þennan dag, þó var hún mjög stutt, og ég hélt að ég ætlaði ekki að hafa það að keyra Galantinn hans Hákons Þorvaldssonar heim (ég var farlaus fyrst að Vignir tók mjólkurbílinn og Hákon lánaði mér bara bílinn sinn), en það tókst og ég lagðist til svefns er heim kom og svaf í einhverja 14 tíma.

Daginn eftir var svo komið að leiknum. Ég verð að viðurkenna að ekki var nú kviknað á öllum ljósum eftir törn föstudagsins og langan svefn aðfaranótt laugardags. En allavega, þetta gekk nú allt bara býsna vel í leiknum, í beinni útsendingu, og leikurinn var jafn og spennandi. Þegar komið er undir lok 3. leikhluta þá er staðan hnífjöfn og við eigum síðustu sókn. Hinn makedónska góðmenni Dimitar Karadzovski leikur sér eitthvað með boltan en sendir svo á mig. Ég tek leiftursnöggt (eins og mín er nú ávallt von og vísa) á rás að körfunni og það er brotið á mér, 2 vítaskot og um 3 sekúndur eftir af 3. leikhluta. Það er tekið leikhlé og menn ráða ráðum sínum, Valur Ingimundar leggur línurnar hvað gera skal ef ég hitti og ef ég hitti ekki úr skotunum o.s.frv. Ég pældi nú ekki mikið í því, rölti að vítalínunni, set bæði vítin ofan í, Keflavík tekur innkast en gengur ekki betur en svo að komast upp völlinn á þessum 3 sekúndum að þeir ná bara örvæntingafullu skoti frá miðju sem geigar um leið og flautan gellur og við yfir með 2 stigum. Ég skokka nokkur skref í áttina að bekknum okkar og ætla að gera mig kláran og setjast þar til að hlusta á leiðbeiningar Vals fyrir síðasta fjórðunginn. En mér að miklum óvörum koma menn af bekknum á móti mér gríðarlega fagnandi, faðma mig og segja vel gert, einnig er mikið fagnað á stuðningsmannapöllunum. Þá var þetta víst 4. leikhluti og ég hálf slysaðist til að tryggja Skallagrím sigurinn. Mér fannst líka óvenju mikið skorað í leiknum miðað við að það væru bara búnir 3. leikhlutar.

Seinna þegar gárungarnir í bænum voru að tala um einhverjar stáltaugar hjá mér gat ég nú ekki annað en verið sammála þeim og glott.

Þar til síðar

Að vera VIP

2011-02-27T14:50:00.000Z

Góðan og blessaðan daginn

Nánast á hverjum sunnudegi í vetur hef ég farið í kvöldmat heim til formanns Værlöse, Kim Mikkelsen (kallaður Mikkel). Það byrjaði svona fyrst og fremst til að horfa á ameríska fótboltan, sem er einstaklega hentugt heima hjá honum því á veggnum hangir 60 tommu sjónvarp. Eftir að NFL- deildinni lauk, þá hef ég nú samt haldið áfram að fara til Mikkel í mat, við horfum þá bara á knattspyrnu og NBA. Á þessum sunnudögum hef ég tekið eftir því að Mikkel er maður sem hefur mjög gaman af því að fá fólk í heimsókn, því oft er mikið um gestagang þegar ég er þarna. Það þarf þá ekkert endilega að vera að fólk sé að koma í mat, heldur meira verið að detta inn, fá einn öl og horfa á leikinn.

Gróflega áætlað eru þetta um 10-12 manns sem tilheyra þessum hóp, og ég kalla þetta Søhaven-crewið, þar sem gatan sem Mikkel býr í heitir Søhaven. Það sem gerir þetta ennþá skemmtilegra er að það eru nokkrir þekktir einstaklingar í crewinu. Sem dæmi má nefna Niels Bjærregaard (40, Séð og heyrt stíll), sem er núverandi liðsfélagi minn, en fyrrverandi landsliðsfyrirliði Danmerkur og atvinnumaður í Evrópu, þannig að hann er svolítil goðsögn í dönskum körfubolta.

Annar tappi er Gustav Juul, hann stjórnar sjónvarpsþætti á TV3 sem heitir Luksusfælden (Lúxusgildran). Þessi þáttur fjallar um að hann við aðra konu heimsækja fólk sem er komið með allt niður um sig í fjármálum sökum ofneyslu á lúxusvarningi. Svo er fólki sagt hvað staðan er slæm og það verður að hætta að kaupa hitt og þetta, með tilheyrandi gráti frá húsmóðurinni (Gustav segir reyndar að hann fái bónus ef það koma tár).

En aðalnúmerið er líklega Tékkinn Zdenek Pospech. Hann spilar stöðu hægri bakvarðar í byrjunarliði FC Köbenhavn, sem dæmi þá var hann í eldlínunni um daginn á móti Chelsea í Meistaradeildinni. Hann býr rétt hjá Mikkel og kemur meira að segja stundum á leiki hjá okkur.

Svo er náttúrulega aðalspurningin hvort ég sé ekki bara hluti af sótsvörtum almúganum sem hangir utan á slíkum stórstjörnum, dæmi nú hver fyrir sig.

Við þetta má svo bæta að ég las um daginn að sjálfur Casper Christiansen úr Klovn býr her í Værlöse, spurning um að bjóða honum inngöngu í Søhaven-crewið.

Þar til síðar

Heimsóknir

2011-02-25T14:45:00.001Z

Heilir og sælir lesendur

Það er ómetanlegt að fá heimsóknir frá gömlum félögum meðan dvalist er erlendis. Afmælishelgina mína hittust allir þeir sem gerðust svo merkilegir að búa í þeirri goðsagnakenndu íbúð Skuggaseli á Hvanneyri. Ekki nóg með að allir íbúar fyrr og síðar hittust, heldur var einnig í hópnum sérlegur heiðursíbúi Skuggasels, Óðinn Gíslason. Að sjálfsögðu gerði fólk sér glaðan dag, já eða daga, og það sem stóð upp úr var tvímælalaust þegar Suðurlands-Sjarminn kastaði af sér vatni við eina af þekktari götum Kaupmannahafnar, og fékk fyrir það skammir frá ýmsum portkonum.

Um síðustu helgi brá framkvæmdastjóri Lýsingar sér í bæinn og kom færandi hendi af allskonar góssi frá Fróni. Hæst ber að nefna pönnukökur frá ömmu og svo nokkur vel valin stykki af einni af mörgum föllnum vonarstjörnum íslenskrar hestamennsku. Ég fór svo að pæla í því eftir að Arnar fór að svipað eins og Íslendingar skreppa í helgarferðir til útlanda til að losna úr viðjum vanans heima fyrir, þá eru svona heimsóknir góðar til að losna heim ef svo má að orði komast. Ekki skemmdi svo fyrir að minkabóndinn Óli Barðdal kíkti á okkur á laugardeginum og margar góðar sögu sagðar.

Það heldur áfram að ganga á ýmsu hjá okkur í Værlöse. Fyrst var Marakkómaðurinn var dæmdur í tveggja ára keppnisbann fyrir að skrópa í lyfjaprófi. Svo var kaninn okkar rekinn á mánudaginn síðasta, karlanginn segi ég nú bara. Ekki stendur til að fá nýjan kana fyrir úrslitakeppnina, þannig að ég verð bara að vera duglegur að borða hrossakjöt svo ég verði stór og sterkur. En ég hef svosem ekki áhyggjur, við spiluðum leik á miðvikudaginn án Kanans og munurinn á liðsandanum var gríðarlegur, við erum öruggir inn í úrslitakeppnina og að ég held að við ættum að geta gert efstu liðunum skráveifu.

Ég lenti í mikilli lífsreynslu á sunnudaginn. Ég og Arnar fórum í mat um kvöldið til formanns Værlöse og hans spúsu. Þegar liðið var örlítið á kvöldið spurði húsfreyjan mig hvort ég væri ekki til í að passa húsið þeirra meðan þau fara í 4 vikna árlega ferð til Thailands. Það var nú lítið mál og svo sem ekki í frásögu færandi annað en það, að þessi ferð er í desember. Ég held að ég hafi aldrei á ævinni lofað mér svona langt fram í tíman. En þarna liggur líklega þónokkur munur á danskri og íslenskri þjóðarsál.

Talandi um mun á Íslendingum og Dönum. Ég var að lýsa ónefndum samlanda mínum við þjálfaran minn, og endaði á þeim orðum að hann væri skemmtilega léttruglaður. Þá svaraði þjálfarinn að allir Íslendingar sem hann hafi kynnst væru a.m.k. léttruglaðir, ef ekki ruglaðri en það. Hverjum þykir sinn fugl fagur.

Þar til síðar

Gamli

2011-02-11T12:27:00.000Z

Góðan daginn

Ég nenni nú ekki að hafa langa tölu á þessum afmælisdegi. Finnst það best að meistari Megas eigi sviðið, en þetta lag á einstaklega vel við, bæði vegna hás aldurs og sérstaklega vegna óæskilegrar hópamyndunar hjá gráum hárunum á hausnum á mér.

Þar til síðar.

Meiri símatími

2011-02-04T18:35:00.001Z

Komið þið öll margblessuð og sæl

Þá er maður loksins búinn að þvo af sér allar syndir í Budapest og getur einbeitt sér að því að nema á danskri grund, og ýmsu öðru t.d. því að skrifa einhverja vitleysu hér inn.

Í tilefni þess að ég fékk nýjan síma í hendurnar nú skömmu eftir jól, þá datt mér í hug að hafa fyrsta pistilinn einskonar framhald af pistli frá því herrans ári 2007, nánar tiltekið marsmánuði, sem bar nafnið símatími. Þegar ég lauk þeim pistli á sínum tíma átti ég von á nýjum síma af gerðinni Nokia 2610. Lítum á hvernig hann og þeir sem síðar komu stóðu vaktina.

Nokia 2610

Með þessum síma fékk ég mér handfrjálsan búnað. Það kom sér ágætlega sumarið 2007 í vörubílaakstrinum, en kom sér þó mun betur sumarið eftir. Ástæðan fyrir því var sú að það sumar vann ég í girðingavinnu hjá Baldri í Múlakoti. Við vorum þónokkuð að vinna í moldarflögum og þetta var þurrt sumar í Borgarfirðinum og mikið ryk og drulla í loftinu og eflaust þónokkur grömm svifið inn í símtækið. Það var til þess að það var lífsins ómögulegt að heyra nokkurn skapaðan hlut í hátalaranum, nema í dauðaþögn og þurfti ég þá oftast að nota handfrjálsa búnaðinn þó að ég væri ekki með uppteknar hendur. Um mitt sumar var gefist upp og nýr sími kallaður til leiks.

Nokia 2630

Já nú átti aldeilis að sigra heiminn með nýjum síma. Notkun á honum hófst á mánudegi, á þriðjudeginum gerði mjög mikið ryk í vinnunni sem að sjálfsögðu komst inn í símann og það var ekkert skárra að heyra í honum heldur en þeim fyrri. Á fimmtudegi var ég að skríða undir vörubíl á malarplani með síman í vasanum, sem endaði auðvitað þannig að ég lagðist ofan á síman og braut skjáinn. Þannig fór um sjóferð þá. Var gamli Nokia 2610 kallaður til starfa á ný og látinn hanga saman fram á haust.

Nokia 1680 classic

Haustið 2008 fór ég út til Budapest til náms. Fljótlega keypti ég mér nýjan síma, hann var nokkuð billegur og góður. Hann sló nú aldrei feilpúst, en þegar ég var staddur á Kastrup á heimleið þá gleymdi ég honum á barborðinu eftir að hafa heyrt nafnið mitt kallað upp í hátalarakerfinu.

Samsung-eitthvað

Þegar í Leifsstöð var komið úr þessari sömu heimferð þá fór ég beint í Elko og náði að semja við strákana þar að selja mér einhvern gamlan Samsung sýningasíma. Einhverri viku síðar týndi ég bakhliðinni á honum þannig að glært límband var vafið um hann til að halda batteríinu. Sumarið 2009 gafst ég svo upp á þeim síma og fékk mér nýjan út í Budapest.

Nokia 2330 classic

Þessi sími reyndist svona þokkalega, hann byrjaði reyndar á því í fyrravor að drepa á sér af og til og vera dauður í svona klukkutíma. Svo var hann reyndar farinn að eyða hinu og þessu út af sér án þess að vera beðinn, t.d. tónlist sem var í minninu, sms-um og minnispunktum frá mér (kom sér frekar illa einu sinni þegar hann hafði eytt bókunarnúmeri). Einnig átti hann það til að skipta hringingunni allt í einu yfir á Nokia tune, þó að ég hafi bókstaflega aldrei verið með þá annars ágætu hringingu. En hann var ennþá nothæfur í grunninn, sem er nú bara býsna gott á tæpu 1 og 1/2 ári í minni eigu.

En nú er semsagt búið að leggja honum og hinn þýski LG T300 keyptur í raftækjadeild Kaupfélagsins hefur verið kynntur til starfa, og stendur sig vel hingað til. Hann er allavega búinn að endast lengur en í 5 daga þannig að hann er ekki sá lélegasti sem ég hef átt.

Þar til síðar

Gervihnattaöld

2010-10-27T22:30:00.001Z

Heil og sæl

Óvart liðinn rúmur mánuður síðan síðast, og ég sem ætlaði að vera svo duglegur að láta vita af mér. Það er nú reyndar engin brjálæðisleg stemning búin að svífa yfir vötnunum þennan mánuðinn, maður er bara að læra og læra og svo æfa og spila.

Ég er nú samt eitthvað búinn að líta upp úr slorinu. Ég bý rétt við vatn sem heitir Søndersø, sem útleggst þá sem Suðurvatn ef danskan sem ég lærði hjá Magnúsi í Sölvanesi er ekki að svíkja mig. Ég tók rúnt í kringum vatnið á reiðhjólinu mínu um daginn og rakst á búfénað, mér til mikillar ánægju, meðal annars Angus kú með fallegan nautkálf. Svo má geta þess að heimavöllur okkar Værløse manna er skírður eftir vatninu og heitir því fallega nafni Søndersøhallen.

Svo ég komi því bara frá strax, þá gengur okkur ekkert svakalega vel í boltanum þessi misserin, en ég er nú ekkert að farast úr stressi yfir þessu, þetta mun allt saman lagast.

Skellti mér til Budapest í síðustu viku til að taka svona eins og eitt próf. Ferðin hófst nú ekki giftursamlega, en ég missti af fluginu mínu. Þar sem þetta var í þeirri viku sem allir Danir eru í haustfríi var nú ekkert sérlega ódýrt að fá annan miða, en mér var alveg sama, það er nefnilega tvennt í þessum heimi sem ég á nóg af, og annað þeirra eru peningar. Ég vildi bara koma þessu prófi frá, og það hafðist.

Það má segja að ég hafi unnið mitt fyrsta ærlega handtak í Danmörku í gær. Hinn eiturhressi marakkóski liðsfélagi minn rekur verktakafyrirtæki, og einn starfsmaðurinn var veikur. Þannig að ég var kallaður út, og þurfti meðal annars að sýna gamla takta í hellulögn, og rífa upp gamalt eplatré, reyndar í fyrsta skipti sem ég geri slíkt.

Nú er ég kominn á það skemmtilega stig í dvöl minni í Danmörku að ég er meira en hálfnaður með tímann sem ég verð hér fram að jólum. Búinn að vera 57 daga og á 50 eftir, þannig að það styttist í að ég fá að líta hinar fögru grundir og háu hamrabelti Skagafjarðar.

Á morgun fer ég ásamt fríðu föruneyti til Svendborg til að etja kappi við heimamenn í danska bikarnum, eða Pokalen eins og hann er nefndur á frummálinu, treysti á að þið hugsið vel til mín.

Þar til síðar

Bílaverkstæðið góðan dag

2010-09-22T20:30:00.005Z

Ég heilsa ykkur frá Sjálandi.

Eins og sjá má í frétt Feykir.is, er nú verið að rífa húsnæðið við Freyjugötuna sem eitt sinn hafði það hlutverk að hýsa Bílaverkstæði Kaupfélags Skagfirðinga. Það hafði víst þjónað mörgum fleiri hlutverkum um sitt æviskeið þetta húsnæði, en ég ætla nú ekki að fara nánar út í þá sálma, heldur einbeita mér að þeim tíma er Bílaverkstæðið var þar rekið. Ástæðan fyrir því er mjög einföld, ég var nefnilega svo merkilegur að vinna þar í einn vetur, nánar tiltekið 2004-2005.

Saga okkar hófst á skemmtilegan hátt. Ég var á balli í Miðgarði, undir lok Heyanna minnir mig, staddur í andyrinu og er að sýna mig og sjá aðra. Allt í einu er hnausþykkum þumalputta rekið á milli rifja á mér, ég fattaði svosem strax hver það var, Rúnar Guðmunds gerir þetta nefnilega mjög oft við mann. Þegar ég var búinn að jafna mig á árásinni þá spyr Rúnar hvort mig vanti ekki vinnu í vetur. Ég hváði jú og þá sagði hann mér að það vantaði einhvern í dekkin á Bílaverkstæðinu, því tilboði var tekið á stundinni.

Ég mætti því galvaskur um haustið og tók við stöðu Dekkjakóngs, og fórst það nokkuð vel úr hendi, að eigin mati allavega. En ég held að það sé best að minnast gamla bílaverkstæðisins með 2 sögum sem gerðust þennan vetur. Það er orðið svo langt um liðið að það er allt í lagi að varpa þeim á veraldarvefinn.

Sú fyrri gerist á föstudegi, og hefst þannig að áðurnefndur Rúnar Guðmundsson kemur til mín með 3 jeppadekk og 2 felgur undan sturtuvagni. Hann hafði verið beðinn um að koma 2 af þessum dekkjum á felgurnar. Gallinn var hinsvegar sá að dekkin voru gerð fyrir 15 tommu felgu og vagnfelgurnar voru 15,3 tommur. Við notuðum litlu dekkjavélina, sem þýddi að dekkið og felgan lágu á hlið. Ef ég reyni að lýsa þessu fyrir þá sem þekkja ekki til, þá er armur á dekkjavélinni sem er með mælinn sem sýnir þrýstingin í dekkinu, og þaðan kemur loftslangan, og svo pumpar maður loftinu með því að stíga á pedala.

Það var ekkert mál að koma dekkinu loftlausu utan um felguna, en hinsvegar var aðeins erfiðara að fá dekkið til að springa upp á bríkina. Á fyrra dekkinu hafðist það fyrir rest en þá voru komin um 90 pund í dekkið, minnir að svona dekk eigi ekki að þola yfir 80 punda þrýsting. Svo tókum við til við seinna dekkið. Ég stíg á pedalan og pumpa og pumpa, fer svo að spjalla við Rúnar og halla mér fram á dekkið. Svo þegar það er komið frekar mikið í dekkið en ekki ennþá sprungið upp á, þá halla ég mér aftur til að sjá betur á mælinn. Í þeirri sömu andrá kemur mikill hvellur, ég sé ekkert nema gráa breiða rönd fyrir framan mig, KTM derhúfan mín fýkur af mér, og allt í einu er ekkert dekk fyrir framan mig. Ég lýt þá snöggt á Rúnar, sem lýtur á mig, svo lýtur hann upp og beygir sig rétt áður en hann fær dekkið og felguna í hnakkan og á axlirnar. Þegar allt rykið sem þyrlaðist upp settist aftur og ég og Rúnar áttuðum okkur á stöðunni, fórum við bara að hlæja.

Seinni sagan er af svipuðum toga. Mig minnir að ég hafi verið að skipta um slöngu í afturdekki af Ferguson 135 sem Bjössi Mik átti. Til þess notaði ég stóru dekkjavélina, sem þýddi að dekkið stóð upp á rönd í henni, en snerti ekki jörð. Það gekk nú svosem allt eðlilega, þar til kom að því að pumpa og fá dekkið til að springa upp á efri bríkina. Ég bar meiri og meiri feiti en allt kom fyrir ekki. Loks áttaði ég mig á vandamálinu, innsta brún neðst á dekkinu, sem sést ekki fyrir felgubrúninni þegar allt er eðlilegt, var ofan á brúninni og því engan vegin hægt að láta efri brún komast upp á öryggisbríkina. Þegar ég átta mig á þessu er ég búinn að pumpa heilmikið í dekki. Hluti af ferlinu við að fatta gallan var að beygja sig niður og skoða þetta nánar. Ég man að ég hugsaði "já þetta er svon.... búmm". Springur ekki blessað dekkið og allt framan í mig. Mér leið eins og einhver hefði strekkt á andlitinu á mér, sá eiginlega ekki neitt og heyrði bókstaflega ekki neitt. Rúnar Guðmunds var fyrstur á staðinn, en ég heyrði ekkert hvað hann var að segja, þekkti hann bara rétt á útlínunum.

Sannarlega á ég fleiri góðar minningar úr þessu húsi, læt þessar tvær duga á prentinu. Get samt ekki sagt að ég sjái mikið eftir byggingunni.

Þar til síðar.

Eitt og annað

2010-09-21T19:48:00.006Z

Heil og sæl og verið velkomin að tölvuskjánum

Rúnar Birgir Gíslason sveitungi minn benti mér á umsögn dansks netblaðamanns, þar sem hann er að spá í spilin fyrir veturinn í dönsku körfuboltadeildinni. Ekki nóg með að hann spái liðinu mínu, Værlöse, næst neðsta sæti, þá segir hann að í liðinu sé Færeyingur sem spilar gróft. Þessi maður hefur greinilega ekki hundsvit á körfubolta, ég er ekkert grófur.

Síðastliðin ár hef ég ferðast töluvert á milli landa, og ávallt notað til þess flugvélar. Það liggur því í augum uppi að oft hef ég þurft að fara í gegnum þessi gegnumlýsingar- og öryggishlið á flugvöllum Evrópu. Eftirminnilegt er þegar ég var stoppaður með 3 kg af óhrærðu skyri og gert að afhenda það yfirvöldum til förgunar, sökum þess að þetta er vökvi, gamli var nú ekkert sérstaklega sáttur með það. Þessi hlið eru þó ekki óbrigðul, um páskana 2009 fór ég 6 sinnum í gegnum öryggishlið með 9 skurðarblöð í töskunni, því ég hafði gleymt að taka þau úr eftir síðasta verklega líffærafræðitímann fyrir þá páska. Svo gerðist það þegar ég var að koma mér fyrir hér úti í Kaupmannahöfn að ég komst að því að ég hafði farið í gegnum öryggishliðið í Leifsstöð með 2 og 1/2 tommu nagla í vasanum.

Enn og aftur að senegalska liðsfélaga mínum, hann sagði við mig um daginn að hann hefði gaman af bandaríska sjónvarpsþættinum Desperate Housewifes. Það er eitthvað svo rangt við að 208sm, helmassaður Afríkumaður hafi gaman af slíkum kellingaþætti.

Ég fékk fyrsta gestinn minn frá Íslandi í síðustu viku. Það var nú ekki uppeldisfélagi, sveitungi eða gamall skólabróðir eins og búast hefði mátt við, nei það var sjálfur Darrell Flake, eini maðurinn sem ég hef spilað með bæði undir merkjum Skalla-Gríms og Tindastóls. Hann þurfti að skreppa frá Íslandi útaf einhverju dvalarleyfis-dæmi og var hjá mér í góðu yfirlæti í 3 daga.

Svo styttist í fyrsta leik, ekki laust við að það sé kominn þónokkur spenningur.

Mæli svo að lokum eindregið með viðtali Kristjáns Más Unnarssonar við Þorbjörn Pétursson, bónda að Ósi í Mosdal við Arnarfjörð. Þetta er maður að mínu skapi, borðar ekki grænmeti og leiðist í Reykjavík.

Þar til síðar

Missir

2010-09-12T10:30:00.002Z

Góðan daginn

Ég sit hér í veldi danans, og hugsa heim í Akrahreppinn. Á næstu klukkutímum fara tvíburarnir Kolli og Leifur að fikra sig út úr Kleifunum, Miðdalsmenn fara að skila sér, og efsti maður þar mætir líklega Dóra á Kúskerpi og hundinum Tenór er þeir koma úr Horni. Þar efst á við dalsmynnin má sjá magnaða sjón sem samanstendur af fé og mönnum á ferð út dalina eftir þessum fallegu og grónu grundum, ýmist ríðandi eða á eigin fótum.

Þetta er mín reynsla af sunnudegi í göngum, því ég hef ávallt farið í Kleifarnar eða Miðdal. Svo er borðað í kofanum og þarnæst safnið rekið niður í rétt. Ég hef nú ávallt tekið í rólega að reka niður, svona eftir að ég fór fyrst í göngur 14 ára gamall. Það er ákaflega góður og fastur punktur í þeirri tilveru að sitja lengi inn í Patrolnum hjá Fúsa á Uppsölum og spjalla, kannski hoppa út og grípa eina og eina gamla ær sem hefur örmagnast og henda henni í kerruna.

Nánast allir sem ég þekki hafa gaman af því að fara í göngur og/eða réttir, og eflaust liggja margar ástæður fyrir því sem ég ætla nú ekki að tíunda hér. En þeir sem hafa líklega mest gaman af því eru sauðfjárbændurnir sjálfir, og ástæðan fyrir því er kannski ekkert sérlega rómantísk, þeir eru að fara að fá útborgað.

Svona trega- og söknuðarpistlar eru nánast árlegir hjá mér, og þó að ég verði nú erlendis næstu árin getur maður alltaf lifað í voninni um næsta haust, kostar víst ekkert að láta sig dreyma.

En að öðru, þessi Senegali sem er í liðinu með mér hættir ekki að skemmta mér með bullinu í sér. Í gær pantaði hann sér t.d. McBacon-borgara en bað þá um að sleppa beikoninu, ég vissi nú ekki hvert ég ætlaði. Til að þið getið áttað ykkur betur á því hvernig hann tala er hér myndband með Eddie Murphy, spólið áfram á 1:00 og þá byrjar Murphy að tala. Röddin hjá Senegalanum er kannski ekki alveg eins, en framburður og áherslur ótrúlega svipað.

Þar til síðar

Einn á flakki

2010-09-06T21:14:00.002Z

Komið nú sæl og blessuð elskurnar mínar

Ekki nema 7 mánuðir síðan ég páraði eitthvað niður síðast, sem er eðlilegt þar sem það hefur nákvæmlega ekkert gerst á þeim tíma, allavega ekkert sem ég man eftir af einhverjum óþekktum ástæðum.

En nú er maður kominn til Kaupmannahafnar, þar sem meiningin er að hafa vetursetu, og því gráupplagt að gera eitthvað af sér. Tæknilega séð er ég þó ekki í okkar fornu höfuðborg, því ég bý í smábænum (um 18.000 hræður) Værlöse sem er 16 km frá miðbænum. Þar er körfuboltaliðið Værlöse Basket Ball Klub staðsett, en með því ágæta félagi mun ég spila í vetur.

Ég lenti á meginlandinu á miðvikudagsmorguninn og var sendur beint á æfingu um kvöldið, mikið óskaplega var það nú erfitt. Til að bæta gráu ofan á svart þá voru 2 æfingaleikir um helgina, sem betur fer gegn 1. deildar liðum (deild fyrir neðan okkur) þannig að það var ekki hundrað í hættunni þó að bensíntankurinn endist ekki allan leikinn.

Liðsfélagarnir koma úr ýmsum áttum. Þeir 2 sem fá þann eftirsótta titil að vera mestu týpurnar, ef svo má að orði komast, eru Dani af marakkóskum ættum og erlendi leikmaðurinn sem kemur frá Senegal (eða hinn erlendi leikamaðurinn, ætli ég þurfi ekki að sætta mig við að flokkast sem slíkur).

Daninn/Marakkómaðurinn er lítill skratti sem talar út í eitt og er alltaf að pæla í einhverjum leiðum til að græða pening. Nú síðast í dag bað hann mig að finna eitthvað sem framleitt er á Íslandi, og mætti selja út um allan heim til að mokgræða. Svo erum við komnir með plan um að mæta á næsta uppboð á minkaskinnum hjá danska uppboðshúsinu, veit nú ekki alveg hvort að hann muni fynna gullæðina sína þar, en það ætti allavega að vera áhugavert. Hann þarf reyndar að fasta þessa dagana út af Ramödunni og því er aðeins farið að draga af honum eftir leiki helgarinnar.

Senegalinn er 208 sentimetrar á hæð, alveg bikarsvartur, rífur kjaft og bullar út í eitt. Eini gallinn við hann er sá að hann var í háskóla í Bandaríkjum Norður-Ameríku og því er hreimurinn hans því miður bandarískur en ekki afrískur.

Nú eru tæpar 3 vikur í fyrsta leik, sem gerir þetta haust líklega stysta undirbúningstímabil sem ég hef tekið þátt í. Fyrsti leikur er 26. sept á útivelli gegn Horsens, en þar þjálfar einmitt Kenneth Webb, sem eitt sinn var við stjórnvölin í Fjósinu í Borgarnesi.

Læt þetta nægja í bili

Þar til síðar

Einn-einn-tveir

2010-02-11T10:55:00.002Z

Ég skil nú ekkert í sjúkra- slökkviliðs- og lögreglumönnum landsins að vera að þvælast inn á afmælisdaginn minn með með svokallaðan 112-dag. Væri ekki nær að hafa þetta bara 1. desember, ég minnist þess nú ekki að nokkuð merkilegt sé að gerast þá, allavega ekki neitt í líkingu við það að ég eigi afmæli.

En nú eru liðin 27 ár frá því að ég lét sjá mig, þremur vikum of seinn og hef verið að reyna að vinna það upp síðan en lítið gengið. Ég hef nú aldrei verið sérstaklega mikið fyrir að halda upp á afmælið mitt, aðallega sökum leti. Ákvað nú að gera samt vel við mig í morgun og fá mér rjóma út á hafragrautinn, rjómi er líklega besti drykkur í heimi, enda notaður í White Russian.

Eins og eflaust flestir, þá velti ég því fyrir mér á þessum degi hvort að ég sé orðinn gamall. Niðurstaðan er svosem einföld.... nei, og í rauninni er enginn of gamall, nema kannski þegar hann drepst og þá er of seint að spá í því. Að hugsa um hvað lífið væri nú skemmtilegra ef maður væri nú á öðrum aldri (sama í hvora áttina það er) er líklega ein mesta tímasóun sem til er, nema kannski fyrir utan það að fara í bíó.

Bókaði flug til Budapest í gær, á víst að mæta í próf í líffærafræði þann 2. mars. Var svo heppinn að ferðin hittir á milli leikja hjá mér, reyndar rétt tæplega því ég dett í Skagafjörðin líklega 2 tímum fyrir leik þann 4. mars. En mikil ósköp er ég ekki að nenna að fara í þessa ferð, mesta spennan liggur í því hvort að ég gleymi einhverju á Kastrup í þetta skiptið.

Myndbandið um sumarið 2009.... loksins

2010-01-11T23:29:00.003Z

Eftir mikið japl, jaml og fuður hefur mér loksins tekist að koma myndbandinu "Sumarið 2009" á netið. Því miður eru þessar síður sem bjóða upp á að setja inn myndbönd svo mikið drasl að ég þurfti að skipta því í 5 parta. Vonandi hefur það ekki of mikil áhrif. Njótið vel.

Takt´eftir því

2009-12-09T08:59:00.003Z

Vegna fjölda áskorana (og þegar ég segi fjölda þá meina ég einn drukkinn mann) þá hef ég ákveðið að brjóta odd af oflæti mínu og hefja skriftir að nýju eftir töluvert hlé.

En ég nenni nú ekki að segja frá öllu sem drifið hefur á daga mína síðan síðast, enda vanur að horfa fram á veginn og líta aldrei um öxl. Þó vil ég geta þess að í haust leit út fyrir að ég væri nánast einsamall að halda uppi búskap í Blönduhlíðinni. Mér til ánægju og skemmtunar tók ég að mér ýmis viðvik fyrir bændur, svona eins og mjaltir og þess háttar smotterí, sekkja korn, garða eins og herforingi, fara í göngur og réttir og taka frá fyrir slátrun. Skemmtilegasta við þetta var það að þessi verk voru aldrei unnin á sama bænum

Talandi um Blönduhlíðina, þá komst ég að þeirri skemmtilegu staðreynd um daginn að 5 leikmenn meistaraflokks Tindastóls í körfubolta geta rakið sig yfir í þessa fallegu hlíð. Fyrir utan sjálfan mig eru það Sigmar Logi Björnsson, ættaður frá Framnesi (í Úthlíðinni), og sjálfir Búbbarnir, Rikki, Svabbi og Hreinsi, sem eru ættaðir frá Minni-Ökrum í Framhlíðinni.

Veturinn ætlar eitthvað að láta bíða eftir sér, allavega hefur Höfðinginn ekki ennþá lent í því að sitja heima ef ég hef þurft að bregða mér af bæ. Tekur því varla úr þessu að leggja honum yfir veturinn, og þó skal ekki fagna strax.

Á allra næstu dögum mun ég ljúka við að klippa saman myndband um það sem ég og hinir áferðarfallegu drengir úr framsveitum Skagafjarðar fundum okkur til dundurs í sumar. Hef fulla trú á því að útkoman verði góð.

Sæl að sinni

Ég er koooominn heim...

2009-07-01T22:57:00.004Z

Já ég er kominn heim

Heilir og sælir kæru vinir.

Loksins loksins komst ég heim. Byrjum á að líta á hvernig mér gekk að koma mér frá Budapest. Ég var nú töluvert þreyttur og vaknaði seint, rétt svo hafði mig út á flugvöll og þurfti að hlaupa að vélinni eftir að hafa eytt töluverðum tíma að græja yfirviktina hjá mér.

Fyrsta stopp var Svíþjóð, nánar tiltekið Malmö. Eftir að hafa verið í landi hina þúsund ljóskna í um 3 tíma sá ég að það var voðalega 2005 og ákvað að koma mér þaðan sem fyrst. Þaðan færði ég mig yfir Eyrarsundið og yfir til Danmerkur. Þar hékk ég dálitla stund, en Danmörk var töff upp úr þar síðustu aldamótum og því yfir litlu að hanga þar, upp í flugvél og til Íslands með þann gamla.

Á Miðnesheiðinni tók á móti mér karlmaður á fertugsaldri, og á engum smávegis Eagle Talon gott fólk. Ég endist í Reykjavík í rúmlega hálfann sólarhring, enda hún svolítið 2007. Því var farið upp í höfuðstöðvar Lýsingar, Höfðinginn ræstur (eini skuldlausi bíllinn í skemmunni hjá Lýsingu) og drifið sig heim í Skagafjörðinn. Framkvæmdastjóri Lýsingar var svo hrifinn af þeirri hugmynd að hann ákvað að drífa sig með í gleðina.

Og þegar við þrír dóluðum okkur niður Vatnsskarðið, og dóla er orð að sönnu því ég keyrði langt undir löglegum hraða, þá hugsaði ég með mér...... við erum í Skagafirði, hér höfum við Kaupfélag, Framsóknarflokkurinn er nokkuð sterkur og sveitaballamenningin lifir enn..... velkominn til ársins 1953.

Íslandi allt

Frí

2009-05-14T13:33:00.001Z

Nenni ekki að skrifa meiri vitleysu fram yfir prófalok.

Heimkoma verður þann 24. júní kl. 22.15

Íslandi allt

Upp í sveit

2009-05-01T06:43:00.003Z

Góðann daginn, og til hamingju með daginn allur verkalýður nær og fjær (Tobíasi verð ég að heilsa sérstaklega því hann er að sjálfsögðu ekki hluti af verkalýðnum, heldur auðvaldinu), sæll Tobías.

Það er ekki ofsögum sagt að ég hafi lagt land undir fót á síðustu dögum. Um síðustu helgi voru Sólheimahundar á hverju strái hér í borginni. Að sjálfsögðu voru helstu kennileiti Budapest skoðuð, t.d. minnsti bar sem ég hef nokkurn tímann séð, en hann er í götunni minni og rúmar örugglega alveg 7-8 manns.

Mál málanna var þó ferðin á sléttuna. Ég hafði sett mig í samband við bóndann Laszlo Gál sem rekur blandað bú í þjóðgarðinum á sléttunni (Puszta). Ferðinni var því heitið til suðasturs frá Budapest á laugardeginum. Hópurinn samanstóð af okkur systkynum, Lindu hinni írsku og Viki, sem var nauðsynlegur fylgihlutur því hún talar ungversku, og bóndinn kunni ekkert í ensku.

Við lentum þó strax í vandræðum á lestarstöðinni, því þrátt fyrir að Viki kynni ungversku, þá var svo erfitt að bera fram nafnið á bænum sem við vorum að fara í, að bæði ég og Viki vorum búin að gleyma því og keyptum bara miða til Kisk-eitthvað, en það slapp allt saman.

Lestarferðin tók um 2 tíma, og meðal annars var stoppað í bænum Kecskemét, þar sem einn helsti áhugamaður Íslands um beikon, Jakob Sigurðarson bjó um árabil.

Svo var lent í Kiskunfélegyháza, og eftir nokkuð strembnar æfingar náðist að bera nafnið á þeim annars ágæta bæ rétt fram, Kískúnfeleghasa (og draga g-ið aðeins). Þar tóku Laszló og hans frú á móti okkur. Svo var haldið í átt að búinu og langþráður draumur að rætast.Það var nefnilega svo að eitt af því fyrsta sem ég komst að um Ungverjaland síðasta sumar var að þeir væru með eigið nautgripakyn, og það líka svona svalt kyn.

Búið er staðsett í miðjum þjóðgarðinum, og nýtur því verndar ríkis, en í staðinn þá eru þau með öll sérstöku ungversku búfjárkynin (hestar, kýr, kindur og svín) og búið sjálft er byggt upp eins og þau voru fyrir 100 árum, þannig að ekki er tækninni mikið fyrir að fara. En þar að auki er búið með góða aðstöðu til að taka á móti ferðamönnum, þannig að einhverju leyti eru nýtísku þægindi nauðsynleg.

Konan hans Laszló (kunni aðeins í ensku) sagði okkur að það hefði ekkert rignt þarna í vor, enda sást það vel á jarðvegi og gróðri, minnti helst á sendnar áreyrar á Íslandi. Þetta hefur sín áhrif á búskaparhætti, því á hverjum degi þarf að sækja kýrnar og kindurnar til að gefa þeim að drekka, því ekkert opið vatnsból er á beitarsvæðinu.

Nautgripirnir eru eingöngu nýttar til kjötframleiðslu. Ég get sjálfur vottað um það að kjötið af þeim er mjög gott. Þeir hafa nú ekki vaxtargetu á við kyn eins og Hereford, en kostir kynsins endurspegla að þetta er dæmigert gresjukyn, harðgert, þurfa ekki gott fóður, litlir burðarerfiðleikar og kýrnar eru góðar mæður. Laszló nefndi það einmitt að á sumrin fá gripirnir eingöngu beitina, og á vetrum fá þeir eingöngu hey af svæðinu. Í gamla daga gengu gripirnir úti allt árið og voru síðan reknir alla leið til Vín til þess að selja þá á markaði.

Svipaða sögu má svosem segja með kindurnar þ.e. þeirra helsti kostur er hversu harðar þær eru af sér. Þær eru að mestu nýttar til kjöts, það þykir mjög gott, en einnig er mjólkin nýtt en að litlu leyti þó.

Ungversku svínin eru þó ótrúlega töff, því þau eru loðin. Þess svín lifa líka villt, þau eru töluvert feitari en þessi hefðbundu svín og þ.a.l. með minna kjöt á sér, en Laszó sagði að kjötið af þeim væri margfalt betra en það sem við kaupum venjulega út í búð.

Eftir þessa kynningu var svo rölt og kíkt í hesthúsið, ég skoðaði gamla, rússneska dráttarvél af gerðinni MTZ, og svo fengum við að sjá einhverja hestasýningu fyrir hina túristana. Síðdegis var svo haldið heim með lestinni, og um kvöldið farið beint á Kacsa (veitingastaðurinn þar sem Kóngurinn mokaði í sig paprikunni sem reyndist vera pipar, í október síðastliðinn) og að sjálfsögðu slátrað einni steik af ungverskri gerð.

Eftir að hafa fengið far með bændum í bæinn og þakkað fyrir okkur á tökum við stutt rölt um bæinn Kiskunfélegyháza. Íbúar þar eru um 30.000, en þú gætir ekki ímyndað þér það, allavega ekki svona við fyrstu sýn. Rólegheitin virðast vera bestu heitin á þeim bænum.

Nú er þessi pistill orðinn óhemjulangur, og af þeim sökum læt ég staðar numið hér í bili, og segi frá hinni ferðinni minni út á land á morgun eða hinn.

Myndir úr ferðinni má sjá í myndaalbúminu, en hér er ein af ungversku nauti.

Íslandi allt.

Það er ekki hitinn heldur rakastigið

2009-04-20T13:58:00.003Z

Ég hlýt að hafa verið í einhverjum sjálfsmorðshugleiðingum í morgun þegar ég ákvað að fara í skólann í gallabuxum. Labbaði heim um hálf 3 leytið, og maður minn sem það var heitt á þeim gamla. Veðurstofan segir 23 gráður á Celsíuskvarða, og hvernig verður þetta eftir svona mánuð. Ég bý reyndar svo vel að geta stillt hitann í íbúðinni á svona 5 gráður, sem er mun nær mínu náttúrulega habitati, þannig að þetta ætti að geta sloppið.

Hér fyrir neðan er hugguleg mynd af mér og Villa Special að eiga Kósýkvöld.

Íslandi allt

Morgunsvefn er melur í búi

2009-04-18T06:42:00.002Z

Góðann daginn

Þá er liðin vika síðan ég kom aftur til Budapest eftir góða ferð heim. Freistaðist til að skella mér í viku úthald á Íslandi, ferðaðist í 39 tíma á þessari viku, og var þunnur upp á hvern einasta klukkutíma.

Þurfti að fljúga í gegnum bæði Vínarborg og London, sem þýðir að ég þurfti að fara 6 sinnum í gegnum öryggisskoðun á þessari viku. Það væri nú ekki frásögu færandi fyrir annað en það, að þegar ég kom aftur hingað út tók ég eftir því að ég hafði fyrir slysni gleymt að taka 10 hnífsblöð sem ég nota í verklega líffærafræði úr bakpokanum, það að tæknilega séð var ég vopnaður í öllum flugunum. En aftur á móti hirtu þessir andskotar af mér 3 kíló af skyri og geltúbu, ég var brjálaður.

Svo eru nú ekki nema 5 dagar í að fjöldi Sólheimahunda hér í Budapest muni tvöfaldast, jafnvel þrefaldast, því Arnar og Kristín eru að fara að mæta á svæðið, og aldrei að vita nema Gamli Sólheimahundurinn fljóti með líka. Ég er bara orðinn nokkuð spenntur því til að hafa ofan af fyrir okkur munum við fara og gera eitthvað það skemmtilegasta sem nokkur maður getur gert, en það er að fara og skoða kýr. Leiðin liggur austur á sléttuna miklu og skoða nautgripakyn þeirra Ungverja (sjá mynd).

Prófataflan er svona að fæðast hjá mér, þetta verður áhugavert, þarf að fara í 12 lokapróf, sem verður auðvitað ekkert nema stuð, og heimkoma verður aldrei fyrr en á þjóðhátíðardag vorn, þann 17. júní.

Íslandi allt

Vor í dal

2009-03-21T18:09:00.003Z

Gott kvöld

Þó að æði ógn og hríðir,
aldrei neinu kvíða skal.
Alltaf birtir upp um síðir,
aftur kemur vor í dal

Nú er ég eiginlega alveg að farast, mig langar svo heim og komast í íslenska vorið, en læt mér duga að horfa á það í gegnum vefmyndavélarnar, það hlýtur að duga. Ekki nóg með að vorveðrið sem er heima núna kveiki á mér, heldur kemur alveg fiðringur við það að úrslitakeppnin í körfunni sé á fullu.

En að öðru, það hlaut að gerast fyrr eða síðar að ég kæmist í kast við lögin hér í Budapest. Ég var á leiðinni í skólann á fimmtudagsmorgun samkvæmt venju, og samkvæmt annarri venju þá ætlaði ég að labba beint yfir Andrássy götuna í staðinn fyrir að taka 30-40 metra krók yfir gangbrautina. Vildi ekki betur til þegar ég stend á miðri götunni en að lögreglubíll kemur þangað askvaðandi og kona skrúfar niður rúðuna og skipar mér að snúa við og nota gangbrautina. Ég varð auðvitað að hlýða því, en með semingi þó. Skemmtilegra hefði verið að hlýða henni ekki og segjast hafa lent í öflugri lögregluþjónum en henni og komist lífs af, förum ekki nánar út í þá sögu hér á vefnum, en flestir lesendur þessarar síðu vita eflaust hvað ég á við.

Það hefur eitthvað örlað á því að ég hafi verið spurður um dagsetningu á heimferð. Það eru komnar mjög fáar dagsetningar á próf, og þar sem þau eru eiginlega öll munnleg þá er þetta að miklu leyti samkomulag milli nemenda og kennara. En ég er allavega ekki að koma heim fyrr en 10 júní í fyrsta lagi, og mjög líklega seinna.

Það eru 19 dagar í Tobías, og djöfull sem það verður leiðinlegt.

Íslandi allt

Sæluvindar

2009-03-01T09:43:00.003Z

Góðann daginn

Á morgun verður sléttur mánuður síðan ég yfirgaf Frón í annað skiptið á þessu ári. Þá eru ekki nema u.þ.b. 3 og hálfur mánuður þangað til að ég kem heim aftur, sem er ekki neitt.

Bjórinn á afmæli í dag, kominn á áfengiskaupaaldurinn blessaður kallinn. Ég ætla nú ekki að halda sérstaklega upp á það, nema kannski með einnar mínutu þögn til að minnast þeirra félaga bjórsins sem fallið hafa fyrir minni hendi.

Hr. Tobías tilkynnti mér með formlegum hætti í vikunni að hann hyggst koma í opinbera heimsókn hingað til Ungverjalands helgina 2-6 apríl. Það verður nú gaman, þá mun heimili mitt fyllast af lífsgleði, tillitsemi og umhyggju sem ávallt fylgir þeim úrvalsmanni. Þeir sem vilja slást í för eru beðnir um að hafa samband við Hr. Tobías. Ég lofa því að það verður meira skoðað en í síðustu heimsókn og rugl standardinn eitthvað lægri..... nei best að lofa engu um það.

Það er bara komin dagsetning á eitt próf hjá mér í sumar, og það er 9. júní, þannig að ég er allavega ekki að koma heim fyrr en 11., en líklegt að það verði enn síðar. Þegar ég kem heim fer ég beint í vinnu því fyrir nokkrum vikum réð ég mig til starfa hjá honum Stjána í Höfuð-verk. Ég virðist eiga erfitt með að slíta mig frá því að vinna í kringum tjöru, enda er góð tjörulykt engu lík.

Við í Undirhundunum spiluðum okkar annann leik á síðasta fimmtudag, og mér tókst að vera alveg djöfull leiðinlegur við einn andstæðinginn. Hann röflaði reyndar bara alltaf á ungversku við mig svo kom Zoli til mín og sagði mér að ég ætti að passa mig á þessum manni, því hann væri greinilega snargeðveikur. Hann fékk nú reyndar ríflega 30 stig í andlitið á sér þannig að ég veit ekki yfir hverju hann hefði átt að vera að rífa sig.

Íslandi allt

Hvadda gera?

2009-02-20T20:59:00.003Z

Jó éstet gott fólk.

Loksins komin helgi. Ekki það að þessi helgi verði eitthvað ofurspennandi frekar en liðnar helgar eða þær næstu. Það verður líklega lærdómur í fyrirrúmi. Reyndar er ég mikið að pæla í því að bregða mér í IKEA á morgun, reyndar ekki til að kaupa húsgagn, næturgagn eða neitt slíkt, heldur frétti ég af því í vikunni að þar fást hinir rómuðu sænsku kanilsnúðar. Þið kannist nú öll við þá, heita Kanilgiffler á frummálinu og eru í rauðum pokum (núna er Tobías örugglega byrjaður að tuða eitthvað um að hann kannist ekkert við þetta drasl og farinn að bölva mér).

Undirhundarnir spiluðu sinn fyrsta leik í B-deild háskóladeildarinnar í gær. Kerfið er þannig að veturinn er í raun 2 aðskilin tímabil þannig að við færðumst upp um deild núna um áramót. Skemmst er frá því að segja að leikurinn var sigur....... auðveldur sigur. Munurinn var einhver 30 stig og Sólheimahundurinn með 42 kvikindi.

Það stóð nú samt ekki upp úr, heldur það hversu leiðinlegur ég var við einn leikmann andstæðingana. Þetta var maður rétt hærri en ég, og alveg helmassaður. Því miður fyrir hann voru körfuboltahæfileikarnir af skornum skammti, og ég vék mér upp að honum snemma leiks og sagði við hann að það væri ekki nóg að vera massaður, það þyrfti líka að vera sterkur. Mig langaði reyndar segja við hann það sama og Gamli Sólheimahundurinn sagði eitt sinn við mig, "það er ekki það sama að vera sterkur og vera vinnusterkur" en ég kunni nú bara einfaldlega ekki að snara því yfir á enskt mál í slíku snarhasti. Svo sagði ég við hann að dómararnir voru að gefa honum alltof mikið og hann hlyti að klikka á fyrra vítaskotinu vegna þess að þetta var alls enginn villa á mig. Auðvitað klikkaði hann, og ég minnti hann á orð mín. Svo fékk hann oft að heyra það þegar ég náði frákasti en ekki hann og svo framvegis. Það var farið að gæta pirrings hjá honum undir lokin og einu sinni setti hann öxlina á sér þéttingsfast í brjóstkassan á mér, ég greip um brjóst mér og sagði honum nokkrum sinnum hversu vont þetta hefði verið, hann kom hins vegar með kombakkið "shut the fock up". Næst þegar leikur var stöðvaður henti hann boltanum í hausin á mér, mér fannst það bara fyndið.

Svo er spurning hvort ég ætti ekki að taka það upp á næsta level að vera leiðinlegur í næstu viku. Troða mér á milli á bekk andstæðingana í leikhléum og spurja "er ég að trufla?".

Eftir leikinn komst ég svo að því að þjálfarinn minn, sem er á 4. ári þurfti að vakna kl. 3.30 í morgun því hann var að fara í fjósskoðun með bekknum sínum. Ég sendi hann strax í það mál að athuga hvort ég mætti ekki koma með í næstu ferð, og ef það er hægt þá skelli ég mér, það er alveg pottþétt.

Íslandi allt.

Enginn leikur....

2009-02-14T16:55:00.002Z

Góðann daginn

Mér finnst það bara ekkert sérlega sniðugt að á meðan ég sit hér og hugsa um efnaskipti og hitastjórnun líkamans fyrir prófið á mánudaginn, þá er ansi stór hluti Skagfirðinga við hugann við svolítið annað. Já sameiginlega blótið er í kvöld, líklega í síðasta skipti með þessu sniði eftir því sem mínar heimildir herma. Ég tek þessu nú eins og hverju öðru hundsbiti, ég mæti bara margefldur árið 2013.

Annars er mál málanna núna bekkpressukeppnin sem ætla í við Hr. Tobías í sumar. Undirbúningur ef hafinn hjá mér, en Tobías er byrjaður með einhverjar afsakanir strax.

Lífeðlisfræðikennarinn minn, hann Tíbor Bártha, kom með mikla speki í liðinni viku. Í fyrsta lagi sagði hann frá því að 40% af heilbrigðiskostnaði hvers manns fyrir ríkið liggur í 2 síðustu vikum ævinnar.

Í annann stað var hann að útskýra hvað feed-forward mekanismi væri (ætli það væri ekki "fyrirfram-viðbrögð við breytingu á ástand" á íslensku). Tók hann sem dæmi þegar hann kom inn á McDonald´s einu sinni við þjóðveg. Það var ekki kjaftur á svæðinu en samt var búið að kveikja á öllum pönnum og pottum og framleiðsla á fullu. Eftir smástund komu 2 rútur fullar af fólki og allt klárt til þess að afgreiða það. Það var semsagt svona feed-forward að rúturnar hafi hringt á undan sér og látið setja allt af stað á McDonald´s.

Og í þriðja lagi þá var hann eitthvað að tala um losun líkamans á efnum, og sagði að líkaminn losaði sig strax við helminginn af bjórnum sem við drekkum, þetta var það eina sem ég man úr þessum tíma.

Góða skemmtun á blótinu.

Íslandi allt.

Viltu með mér vaka er blómin sofa.

2009-02-05T21:58:00.002Z

Gott kvöld góðir hálsar.

Þá hef ég snúið aftur til Budapest. Eins og eðlilegt er, þá var frekar erfitt að kveðja Íslands fögru grundir, en þetta verður nú allt gott og blessað þegar ég verð kominn inn í daglegt líf hérna aftur.

Ég var spurður að því hérna úti hvað ég hefði gert í jólafríinu. Svarið var eitthvað á þá leið að ég hefði verið að njóta lífsins með hundunum fram að hádegi, svo horft á 2-3 leiki í háskólakörfuboltanum, farið á æfingu og svo þjálfað drengjaflokkinn. Óskaplega var það nú gott líf. Ekki má nú gleyma því að ég sýndi mig þónokkuð og sá aðra. Sem dæmi þá tók ég svokallað tvennutilboð og skellti mér á þorrablót 2 kvöld í röð, í Lýtingsstaða- og Skarðshrepp. Þar vorum við félagarnir í toppformi, enda toppnáungar. Annari tvennu náði ég um síðustu helgi í Krísuvík. Var að sjálfsögðu kíkt í bæinn bæði kvöldin.

Skemmtilegast var samt eiginlega þegar ég og Ari þurftum að útrétta aðeins á laugardaginn. Verkefnið var að skipta á frystikistu fyrir ísskáp í Elko. Sökum heilsubrests tók það okkur ekki nema 4 tíma, enda átti ég svo sannarlega skilið að fá mér bjór eftir það.

Á leiðinni út þurfti ég að stoppa í Kaupmannahöfn aldrei þessu vant. Hún Ása frænka mín tók á móti mér og bauð mér í heimsókn því ég þurfti að stoppa svo lengi. Þar spjölluðum ég, Ása og Jörgen maðurinn hennar mikið, og drukkum bjór og ákavíti. Ég verð að viðurkenna að þar sem ég hef aldrei á ævinni talað dönsku fyrir utan að panta mér pylsu, þá var mér eiginlega farið að svima eftir að tala samfleytt í 4-5 tíma.... það hefur kannski bara verið bjórinn og ákavítið.

Læt þetta nægja í bili.

Íslandi allt.

Fram og til baka.

2009-01-02T22:50:00.003Z

Góða kvöldið, gleðilegt árið og allt það gott fólk.

Það má til sanns vegar færa að ég sé eiginlega búinn að hafa það of gott síðustu 2 vikur hér heima. Slökun, át og drykkja ýmiskonar er búið að vera rauði þráðurinn í gegnum þetta. Því miður er ekki alltof margt til frásagnar, af ýmsum ástæðum. Get þó sagt frá því að ég átti alveg toppþynnkudag þann 28., því þá var ég dreginn fram á afrétt að leita að lambi sem Fúsi á Uppsölum á. Reyndar hljóðaði upphafleg verklýsing Trostans þannig að það væri engin ganga, en annað kom svo á daginn. Það sem bjargaði okkur Villa Special var toppformið. Svo tók ég þátt í bústörfunum á Miklabæ og fékk rauðvín að launum frá Prófastinum.

En komum við þá máli málanna, það er utanlandsferð á morgun. Ég og 2000-vandinn ætlum að leggja af stað um rismálabil, og svo er bara flug um 5 leytið. Óneitanlega er það svolítið skemmtilegt að vera fjallbrattur námsmaður sem fer í 5 daga "skottúr" til Ungverjalands svona um þessar mundir. En eins og ég hef nú sagt, þá væri maður sennilega löngu bognaður ef ekki væri fyrir skagfirska loftið sem maður er jú svo uppfullur af. Svo er endurkoma þann 7. jan, í miðri viku altsvo.

Íslandi allt

Er völlur grær.....

2008-12-18T20:37:00.002Z

Komið þið öll sæl og blessuð elskurnar mínar

Ég er kominn heim.... já ég er kominn heim.

Síðasta prófið mitt sem var í hádeginu á mánudaginn, gekk eins og í sögu og það sem mér leið vel að vera búinn og næsta mál á dagskrá var að koma sér heim. Fluginu frá Budapest seinkaði reyndar aðeins, en hafðist þó og Unnur tók á móti mér og ég lenti bara í pizzu og bjór heima hjá henni, sem betur fer átti ég alveg skilið að fá mér nokkra.

Svo var það predikun þriðjudagsins að koma sér frá Kaupmannahöfn og til Íslands. Það hafðist nú nokkuð áfallalaust, gleymdi reyndar símanum mínum á flugvallarbarnum á Kastrup, hann er sennilega einhverstaðar nálægt veskinu hans Unnsteins. En mér var svo sama, ég var á leiðinni heim, og um hálf 3 leytið steig ég fæti á íslenska grund.

Tók svo rútuna í bæinn og labbaði til Arnars frá BSÍ, og ég get sagt ykkur það, að aldrei hefur mér liðið jafn vel að koma til Reykjavíkur, vera þarna í frostinu og anda að sér ferska loftinu. Tímanum í borg óttans var eytt í að þeytast á milli bæja og taka stöðuna á þjóðfélagsmálunum, og svo heilsaði ég upp á Höfðingjann.

Lokaspretturinn hófst svo í hádeginu í gær, fyrsti viðkomustaður var Skuggasel á Hvanneyri, þar beið mín hádegismatur að hætti hússins, skömmu áður hafði ég reyndar komist að því að ég tók bíl- og húslyklana hennar Stínu með mér (ég hlýt að fara að slá einhver met í þessu). Á Blönduósi var komið við og fengið kaffi hjá Víði.

En 7 mínutur yfir 6 (eða um miðaftansbil, eins og Bjarnastaðabeljurnar forðum) þá leit ég Skagafjörðinn augum í fyrsta skipti síðan 21. ágúst, og mikið leið mér vel þá, svo versnaði nú skapið ekkert við að sjá að það er verið að byggja bílaverkstæði, endurbyggja Kaffi Krók, stækka mjólkursamlagið og byggja nýtt pósthús. Smjörið drýpur gott fólk.... það drýpur.

Svo held ég að morgundagurinn verði nokkuð góður, nei það er alveg pottþétt.

Íslandi allt

Er jólin garðinn ganga í.....

2008-12-02T11:53:00.001Z

Gettu hvað mig fer að langa í?

Íslandi allt.

Þrælahald

2008-11-24T21:28:00.003Z

Góða kvöldið

Datt í hug að segja frá tvennu skemmitlegu sem kom fyrir í dag.

Þegar ég var að rölta heim í kvöld eftir æfingu tók ég eftir því að það voru nokkrir unglingspiltar að kasta snjóboltum. Í fyrstu veitti ég þessu ekki mikla athygli, þar til ég sá að þeir voru svona 4-5 saman að henda snjóboltum í mann sem leit út fyrir að vera um miðjann aldur. Þeir voru nú ekki alveg að spara það við kallinn, dúndruðu nokkrum sinnum í andlitið á kallinum. Þá þótti honum nóg komið og ákvað að grýta Heineken bjórnum sínum (sem var greinilega ekki tómur) í áttina að einum stráknum, sem fór nú ekki betur en svo að hún endaði í nýlegum Ford Focus. Ég ákvað að halda bara mína leið, en þeir voru engann veginn hættir að kljást.

Í lífeðlisfræði eru menn að basla við að troða inn í okkur visku um meltinguna þessa dagana. Sá sem kennir þann hluta er hinn stórskemmtilegi Tíbor Bartha, sem yfirleitt notar viðbrögð líkamans við áfengisneyslu sem dæmi um einhverja ákveðna lífeðlisfræði, t.d. að þú hafir 18 sekúndur til að drífa þig inn á klósett til að æla eftir að þú færð ónotatilfinningu í magann eftir stífa drykkju. Nema einu sinni þegar hann sagði sögu af því að seinni kona afa hans hefði reynt að drepa sig með svefnlyfjum en ekki orðið ágengt og afi hans (sem var dýralæknir) hefði hlegið að henni, því hann vissi alltaf að lyfin myndu ekki duga. En í dag talaði hann um vin sinn, sem hann kallaði þræl sjálfvirka taugakerfis síns, og sagðist í raun alls ekki skilja fólk eins og hann, sem getur ekki talað þegar það verður svangt og verður að fá að borða hvað sem tautar og raular. Ég tók þetta beint til mín.

Íslandi allt.

Meiri snjó

2008-11-23T15:55:00.002Z

Góðann daginn

Það byrjaði að snjóa hér í Budapest í gær, og er það fyrsti snjórinn sem lætur sjá sig þennann veturinn. Þetta var nú ekkert gríðarlegt magn sem kom, en manni leið ágætlega að labba út í verslanamiðstöðina í gær, með vindinn í fangið og með hausinn undir sér. Verslanamiðstöðvarnar eru það eina sem er búið að skreyta hérna, en maður fékk smá fiðring fyrir jólunum við að koma þarna inn í gær.

Geri fátt annað en að læra og telja niður að heimkomu þessa dagana. Um 22 sólarhringar þar til ég legg af stað áleiðis til Kaupmannahafnar. Það eina sem ég geri fyrir utan þetta er að spila körfubolta, við spiluðum 2 leiki í síðustu viku. Í báðum tilvikum var sigur..... auðveldur sigur. Ég er farinn að brydda upp á því í leikjum að ná að skutla a.m.k. einum andstæðingi út í vegg þegar ég kem á siglingunni á sóknarfrákast, bara til að stytta mér aldur. Það hefur reyndar hlotið misjafnar undirtektir hjá viðhafandi aðilum, en það er nú allt í lagi.

Íslandi allt

Er þetta ekki týpískt?

2008-11-13T22:28:00.002Z

Godt aften mine damer og herrer.

Var að koma heim frá fjórða sigri okkar Undirhunda. Setti eitthvað á þriðja tug stiga og átti teyginn í fráköstum. En það sem stóð upp úr var að eitt sinn þegar ég náði að fiska ruðning, þá var ég skallaður í hökuna og það kom þokkalegur skurður. Ekki vildi hann lokast (og þetta var í fyrsta leikhluta), þannig að það blæddi úr mér allann leikinn. Magnað samt að dómarinn gerði enga athugasemd við þetta.

Að leik loknum vildu félagarnir að ég léti athuga þetta á spítala. Mér þótti nú betra að hlýða því þar sem þeir flestir eru orðnir hálæknismenntaðir. Ég byrjaði nú á því að reyna að mana Zola sem er á fimmta ári að sauma mig en hann þorði því ekki, sagðist ekki vita hversu mikið hann ætti að deyfa mig, ég sagði bara passlega mikið, eins og oddvitinn í Hreppnum eina hefði sagt. Sem minnir mig á það að í verklegri lífeðlisfræði í dag átti ég að sprauta 0,2 ml af einhverju efni í hjartað á rottu, en ég ákvað að dúndra bara öllu sem var í sprautunni, sem var 1 ml sem reyndist vera full mikið fyrir hjartað og það hætti að slá. En aftur að skurðinum, það kom sér einkar vel að íþróttahúsið er svona 30m frá dýraspítalanum og ég skundaði þar inn og fékk aðhlynningu, enda eru Sólheimahundar ekkert lægra settir en aðrir hundar.

Íslandi allt

Heimkoma

2008-11-11T20:54:00.002Z

Jú gott kvöld

Var að enda við að panta flugmiðana heim. Ferðaáætlunin hljóðar svo að ég flýg til Köben á mánudeginum 15. desember, á að lenda þar er klukkuna vantar 25 mínutur í 8. Svo fæ ég að gista hjá henni Unni á Litlu-Reykjum yfir nóttina og á svo flug er klukkan verður korter gengin í 1 (og þá verða sagðar dánarfregnir og jarðarfarir). Lending á Fróni er áætluð um hálf 3. Veit svo ekki alveg hvernig eða hvenær ég kemst norður, enda algjör óþarfi að hugsa svo langt fram í tímann, ekki er ég nú vanur því. Djöfull eiga drengir gott.........

Íslandi allt

Hrokkinn í gang

2008-11-01T23:25:00.002Z

Ég bíð lesendum gott kvöld frá sléttum Austur-Evrópu.

Það má með sanni segja að við félagarnir séum hrokknir í gang eftir mikið hikst. Ekki nóg með það að ég persónulega er kominn í gang eftir árásina hjá strákunum síðustu helgi, heldur fékk Arnar Snær Kárason, sérlegur ræðismaður Ánastaða á Íslandi símhringingu í gær frá Öskju um að þeir hefðu sett síðasta púslið í Höfðingjann, og hann er eins og nýsleginn túskildingur. Þannig að næsta sumar munum við félagar, sameinaðir á ný krúsa um götur Sauðárkróks eins og enginn sé morgundagurinn, það er alveg pottþétt.

Síðasta helgi var já, svona eins og hún var. Tobías kom með lista yfir það sem átti að gera um helgina og á honum stóð "Rússíbani, Bankinn, King Arthur og Hassburgers". Fyrstu 3 atriðin voru annað hvort lokuð eða hætt starfsemi, og ég er ekkert viss um að þetta síðasta hafi nokkurn tíman verið til nema í hausnum á Tobíasi, eins og svo margt annað.

Það var leikur hjá mér á fimmtudaginn. Ég var svo heppinn að það var einhver hlunkur að dekka mig sem var svona já.. ekki í góðu formi. Þannig að ég lék mér nú bara að því að keyra upp hraðann, og þegar ég vissi að ég var kominn með 20 stig í hálfleik þá sagði ég við liðsfélagana "I ain´t passing that shit". Stóð alveg fyllilega við það og endaði í 50 stigum, einu stigi meira en andstæðingarnir. Hef ekki skorað svona mikið síðan í framhaldsskólamótinu 2002 minnir mig, þá var ég einmitt skítþunnur og lék með ekki ómerkari mönnum en Gústa Grodås, Valgeir Levy og Kussmann.

Fór á írska pöbbinn (Becket´s) í gærkveldi og greip í 2 öl. Ætlaði að passa mig vel á því að koma þokkalega snemma heim, en sem betur fer þurfti ég ekkert að passa mig, það voru aðrir sem sáu til þess að ég þurfti að fara snemma heim. Best að vera ekkert að opinbera þetta nánar, aðgát skal höfð í nærveru sálar. Æ jú hún á ekkert betra skilið fyrst hún er vinur minn. Sandra steindrapst á Becket´s þarna um 2 leytið og ég, Ölrún og Aileen drösluðum henni heim.

Býst við að næsti eini og hálfi mánuður verði rólegur í öðru en lærdómi, og viti menn, þá er ég kominn heim.

Íslandi allt

Flottir

2008-10-25T22:51:00.002Z

Já gott kvöld

Kallarnir búnir að vera flottir í dag..... Þvældumst eitthvað í dag og hugsuðum fyrst og fremst um það hversu ógeðslega þunnir við værum og komum engu gáfulegu niður. Þó svo að við náðum aðdraga Tobías af stað í gær þá var það eins og að draga með sér lík á lífið........ man ekki eftiar að hafa sagt orð við hann í bænum. Ætluðum í kvöld á stað sem Tobías er búinn að tala um í marga mánuði að væri toppstaður..... nei nei, löngu búið að loka búllunni. Ætluðum að borða með Guðsgöfflunum þar en báðum svo taxann að taka okkur á flottan stað. Enduðum með því að fara á stað sem New Yourk Times segir að sé besti veitingastaður í Budapest. Ég mætti þarna í John Deere bol og þjónarnir hlógu að okkur út í eitt, því við kunnum engann veginn almennilega mannasiði og vorum eins og fífl þarna. Svo ætlaði Kóngurinn að sporðrenna paprikunni léttilega en það var hins vega rótsterkur pipar þannig að hann tók andköf, allir hlógu og þjónarnir með...... en kallarnir voru flottir og borguðu um 50þús. kellingar fyrir þetta. Við erum á leið á bankann.

Jó estét

2008-10-24T19:26:00.003Z

Já gott kvöld

Drengirnri lentu í gær, og það var bara ein regla, og það var að fara ekki á strippbúllu. Sú regla var brotin strax í gærkvöldi. Okkur til björgunar ákvað reynslumuesti maðurinn í ást til kaups að kötta á verkefnið strax í fæðinug. En sökum einbeitts brotavilja sumra ferðalanga þurfti að beita ofbeldi og má með sanni segja að það stórsjái á Kónginum, enda var hann laminn með krepptum hnefa. Ég reyndi að fara niður rúllustiga sem fór upp á við...... það gekk ekki, ég villtist svo á starfsmannaklósettið í mallinu sem við voru í...... og af einhverjum ástæðum tókst mér að leiða strákana heim af strípistaðnum, en því miður slátraði Kóngurinn ruslafötu á leiðinni. Versta við þetta allt saman var að mér og Logan fannst eigandinn að strípistaðnum vera alveg toppnáungi sem mætti treysta, og ekki höfum við slæma dómgreind....... jú kannski við erum vinir Tobba.

En nú er Tobías dauður og um að gera að skála fyrir því!!

Íslandi allt

It´s the end of Budapest as we know it

2008-10-23T16:16:00.002Z

Lítið af fólki á ferli, óeirðalögreglan búin að loka niður á aðalgötuna, þyrlur sveima yfir borginni...... og 2 tímar í að strákarnir lenda, þetta verður suddalegt.

Íslandi allt

Loftvarnir

2008-10-17T18:46:00.003Z

Gott kvöld

Sá rétt í þessu að Össur Skarphéðinsson vill ekki að Bretar sinni loftvörnum fyrir Ísland, mikið óskaplega er það nú skemmtilegt. Í þessu eins og svo mörgu öðru finnst mér við Íslendingar vera að seilast um hurð til lokunar með því að fá útlendinga til að sinna þessu. Því er ég með þá tillögu um flugher Íslands, hann mun samanstanda af einni rellu, Hr. Tobías mun verða flugstjóri og Sprittarinn verður í faþegasætinu með haglarann grjóthlaðinn, feitann vindil í kjaftinum og bokku undir sætinu. Munu þeir sinna eftirlitsflugi yfir Íslandi á föstudögum frá kl. sextánhundruð þangað til Barinn opnar.

Óskaplega er nú fátt sem ég hef að segja frá sjálfum mér, ekki nema það að systir hennar Ölrúnar kom í heimsókn færandi hendi, því í fórum sínum hafði hún tóbaksdós, alveg himneskt. Helgin verður ömurleg þar sem það verður lærð lífeðlisfræði svo að ég geti einbeitt mér að öðru um næstu helgi...... og já ég er að fara í verklega líffærafræði í fyrramálið til að vinna upp tímann sem við missum næsta föstudag.

Já það er nefnilega 4 daga helgi eftir viku (Kóngurinn og Per kannast nú aldeilis við svoleiðis helgar) vegna þess að það er almennur frídagur á fimmtudaginn og svo gefið frí í skólanum á föstudag. Ég hlakka mikið til fimmtudagsins, því það er víst mikil óánægja með forsætisráðherrann hérna í Ungverjalandi og það verða mikil mótmæli, eðlisfræðikennarinn var að vara okkur við því í gær að vera á ferli. Í fyrra var víst skriðdreka stolið og hann keyrður eitthvað um borgina, og þá var ekki verið að mótmæla neinu, bara svona almenn fylleríslæti. Þannig að þetta ætti að vera áhugavert og ég mæti sko með upptökuvélina.

Íslandi allt

Má ég fá harðfisk.....

2008-10-13T19:42:00.003Z

Já harðfisk með sméri....

Jú gott kvöld.

Var að koma af æfingu...... svo er bara ekki æfing fyrr en eftir viku, frekar mikil rólegheit. Átti ótrúlega óspennandi helgi þar sem ég sat við skrifborðið og las líffærafræði mest allann tímann. Jú svo auðvitað fylgdist maður með gangi mála heimafyrir.

Ég held að ég hafi sjaldan verið jafn spenntur fyrir því að fara í hraðbankann til að sjá hvort Geir Gordon hafi allavega staðið við eitthvað og viti menn, ég náði pening út og það á þokkalegu gengi. En þegar ég pæli svona í því þá hef ég margoft farið í hraðbanka og ekki haft hugmynd hvort ég fái einhvern pening, og alltaf jafn kátur þegar peningur hefur komið.... beint á barinn.

Ég ætla að fara boycotta Bretland, var jafnvel að spá í að sniðganga ekki einungis breskar neysluvörur heldur líka t.d. enska boltann. Reyndar yrði þetta kannski eitthvað sem maður vissi ekki hvar ætti að byrja og hvar enda, ég ætla allavega að reyna mitt besta. Að sama skapi ætla ég að fara að styrkja Rússana og auka þar með neysluna á eftirtöldum rússneskum vörum:

VODKA

Ég þarf svo sannarlega ekki á því að halda að Egill Helgason silfurhafi reiðist Jóni Ásgeiri fyrir mína hönd, ég er algjörlega fullfær um að gera upp hug minn til þessara manna sjálfur. Þetta eru fínir þættir hjá honum og allt það, en að þessi landbúnaðarhatari og 101 Krati slái sig til riddara og sé eitthvað að reiðast fyrir hönd þjóðarinnar er ekkert annað en hræsni.

Talandi um Krata, Ingibjörg Sólrún átti í dag hörkuinnlegg í umræðuna á mbl.is........... eða ekki.

Jolli var nú svo góður við mig að senda mér 3 fyrstu Dagvaktar þættina í gær og þann nýjasta núna rétt áðan. Eina vonda við það allt saman er að ég fæ alveg hrikalega heimþrá þega byrjunartrailerinn er spilaður, sjá bæina, kýrnar, landslagið, girðingarnar, stikurnar, þjóðveginn...... þá langaði mig pínu heim. 10 dagar í drengina.

Íslandi allt

Nostrovia

2008-10-10T18:49:00.002Z

Ég segi nú ekki annað en bara.... púff, yfir þessu öllu saman.

Held að vonbrigðasvipurinn á mér hafi ekki leynt sér í gærmorgun þegar ég var að stökkva í skólann klukkan 9.30 að staðartíma, en ákvað að kíkja á mbl.is áður en ég slykki á tölvunni. Þá sá ég staðfestingu á falli Kaupþings, þagði og dæsti loks. Kvöldin í þessari viku eru eiginlega búinn að fara í að vera á mbl.is, visir.is og msn-ast og tala við fólkið heima, til að fylgjast með ástandinu. Þakka nú bara fyrir að það hitti svo á að á mánudagsmorguninn var ég búinn með reiðuféð mitt og fór því í hraðbankann og tók út þokkalegann skammt af forintum áður en allt opnaði vestan við mig, og þ.a.l. lokað á allar millifærslur.

En það er nú alltaf eitthvað sem getur létt manni lundina, sem dæmi þá var ég að labba í höfuðstöðvar ungverska póstsins í morgun og á Andrassy götunni var alskeggjaður róni með jólasveinahúfu, það fannst mér mjög skemmtilegt og tók ég mynd af honum með símanum mínum. Í hádeginu var hann ennþá með jólasveinahúfuna. En ástæðan fyrir ferð minni í aðalstöðvar póstsins var sú að kassi sem Gamli Sólheimahundurinn sendi mér fyrir all nokkru var þar staðsettur. Reyndar hafði hann víst komið á pósthúsið næst mér fyrir all nokkru, en ég fann nú bara miðann um það að ég ætti pakka, liggjandi á jörðinni í síðustu viku, og komst að því að kassinn var lagður af stað frá mínu pósthúsi áleiðis til Íslands. Sendi ég þeim póstverjum tölvupóst og sagði þeim frá raunum mínum, 2 dögum síðar fæ ég bréf í ábyrgðarsendingu frá höfuðstöðvum póstsins um að pakkinn hefði verið stöðvaður þar og ég gæti sótt hann innan 28 daga. Gerði ég það í morgun og er þá geitin Heiðrún frá Ánastöðum loksins komin upp á vegg í íbúðinni, og svo fékk ég harðfisk líka.

Spilaði fyrsta leikinn í gær með ÁSE Underdogs, sem er skólaliðið. Leikurinn verður nú seint sagður flottur en hann vannst 72-70, það er nú ekki tekin meiri tölfræði nema leikskýrslan þannig að eina sem ég veit var að ég skoraði 33 stig, held ég geri eins og Gústi Guðmunds og telji fráköstin mín í næsta leik. Hins vegar var nýtingin ekki góð, og ég var algjört svarthol, en maður verður að prófa ýmislegt. Svo er nú ekki leikur fyrr en eftir 3 vikur, og við missum 2 næstu fimmtudagsæfingar vegna þess að það eru einhverjir tónleikar í skólanum, þannig að það eru samt bara 3 mánudagsæfingar fram að næsta leik, sweet.

Það er orðið ljóst að ég kem heim seint 15. desember eða 16. desember í jólafrí, og ef mér tekst ekki að klúðra neinu þá fer ég ekki aftur fyrr en um mánaðarmótin janúar-febrúar.

Best ég endi þetta á orðum sem Gunnar í Glaumbæ sagði svo oft við mig hér á árum áður, og eiga svo réttilega við á þessum tímum, "Það er nú engin þörf á að kvarta meðan blessuð sólin skín".

Íslandi allt.

Gott að fólk hlustar á mig

2008-10-07T17:03:00.001Z

Skagfirðingar geyma peningana í Kaupfélaginu

Nokkuð hefur borið á því síðustu daga að íbúar í Skagafirði taki peninga sína út úr bankastofnunum og leggi þá inn hjá innlánsdeild Kaupfélags Skagfirðinga. Sveiflukóngurinn Geirmundur Valtýsson, sem er forsvarsmaður bændaviðskipta hjá Kaupfélagi Skagfirðinga, staðfesti þetta í samtali við héraðsfréttablaðið Feyki. Kaupþing og Landsbankinn eru með útibú í Skagafirðinum. Skagfirðingar renna þó margir hverjir hýru auga til Kaupfélagsins, sem býður upp á 15,2 prósent vexti á opnum reikningi, og 6,8 prósent vexti auk verðtryggingar á lokaðri bók.

Tekið af visir.is

Íslandi allt

Ávarp

2008-10-06T20:42:00.004Z

Kæru samlandar

Síðastliðnir dagar hafa verið æði sérstakir. Tilfinningin sem ég hef fengið við að sitja hér við Dónárbakka og fylgjast með fréttum heima á netmiðlum Íslands, er líkust þeirri tilfinningu sem ég fæ við að horfa á hádramatíska kvikmynd, svo ótrúlegar eru sumar fréttirnar. Þetta horfir sjálfsagt öðruvísi við ykkur flestum, verandi í miðri hringiðunni og finna fyrir þessu, alveg inn að beini.

Vissulega kemur ástandið sér illa fyrir efnahaginn á mínu heimili, það er auðvitað svona nokkuð þungur baggi að leigan sé búin að hækka um 20.000kr. en þar sem ég hef ekki ennþá tekið ákvörðun á lífsleiðinni sem hefur valdið því að ég hafi grætt pening, er ég í nokkuð góðri æfingu að tapa. Hinsvegar hef ég engar áhyggjur af því að við eigum ekki eftir að standa þennann storm af okkur, við höfum jú ennþá sterkar stoðir þjóðfélagsins til staða, eins og t.d. landbúnaðinn og Kaupfélag Skagfirðinga. Ég tók þá ákvörðun nú í dag að megnið af mínu sparifé sem var til staðar hjá Glitni verður fært þaðan og til innlánsdeildar Kaupfélags Skagfirðinga, hvet ég ykkur eindreigið til að gera slíkt hið sama.

Til þess að létta okkur lundina svona í lokin þá tilkynni ég það hér með að ég verð heima í Skagafirðinum nánast frá 20-21. des. til loka janúarmánaðar. Þarf að vísu að skjótast til Budapest og taka eitt próf þann 6. jan, en kem heim aftur eins fljótt og auðið er. Að sjálfsögðu mun ég taka skóna (vonandi báða í þetta skiptið) með mér heim og taka nokkra leiki með mínum gömlu félögum, og verð að viðurkenna að ég er orðinn helvíti spenntur fyrir þessu.

Íslandi allt

Gengið til góðs

2008-10-02T14:08:00.003Z

Góðann dag kæru lesendur

Nei það er nú varla hægt að segja að gengið á íslensku krónunni séð til góðs þessa dagana, nema kannski fyrir sjómennina. En alveg er þetta magnað með ykkur þarna heima, ég má varla bregða mér aðeins frá, þá ráðið þið bara ekki neitt við neitt. Svo sá ég á mbl.is í gær að það er verið að spá því að ástandið gangi ekki yfir að fullu fyrr en eftir 4-5 ár, sem er náttúrulega eðlileg spá því þá kem ég heim aftur.

Varðandi Hvanneyringa í framhaldsnámi, þá væri það kannski ráð að Landbúnaðarháskólinn myndi hafa sérstakann áfanga um lífið í útlöndum, t.d. er Budapest ekki nema 4000 sinnum stærri en þorpið á Hvanneyri, þannig að það er ekki furða að maður kunni ekki að haga sér hérna. Kennari áfangans yrði Maríus Snær Halldórsson, heimsborgari.

Sá á heimasíðu Vegagerðarinnar að það er allt orðið hvítt á Vatnsskarðinu og Þverárfjallinu, dásamlegt alveg. Hérna hefur hitinn verið að hækka 2 síðustu daga, var í 18°C í dag og spáir 20°C á morgun. Fróðir menn segja mér að það sé u.þ.b. mánuður í veturinn... en ég er við öllu búinn, tók síðbrókina með mér.

Er að spá í að hvíla mig aðeins á borgarlífinu á laugardaginn, ætla að skoða gráa nautgripakynið þeirra Ungverja. Það væri náttúrulega skemmtilegast að taka lestina eitthvað austur á sléttuna miklu, en ef ég nenni því ekki þá tek ég lestina út fyrir bæinn og fer á dýraspítalann fyrir stór dýr sem skólinn rekur, einhvern hálftíma frá Budapest, þar eiga að vera nokkrir gripir.

Í dag eru 3 vikur í að drengirnir mæti, vorkenni samt Arnari og Loga að þurfa að vera með Tobíasi í flugvél í fleiri, fleiri klukkutíma.... ekki myndi ég nenna því.

Þar til síðar

Hörður Magnússon

2008-09-28T08:53:00.002Z

Ég vil nota tækifærið og óska Fimleikafélagi Hafnarfjarðar til hamingju með Íslandsmeistaratitilinn í krasspyrnu, og þá sérstaklega Halldóri Halldórssyni.

En endilega horfið á fréttina á visir.is og hlustið á Hödda frænda þegar Hjálmar Þórarinsson kemur Fram í 1-2 í Keflavík. Talandi um að vera að tapa sér. Smellið hér

Þar til síðar

Did you know.....

2008-09-27T17:53:00.003Z

It was an Icelandic man who invented the kokteil sauce. Mikið finnst mér gaman að rugla í útlendingum með svona alíslenskum bröndurum. Sem dæmi þá sagði einhver Kani um daginn að Sigur Rós væri eina íslenska hljómsveitin sem hann þekkti, og ég svaraði í hneykslunartón "don´t you know Skriðjöklarnir?". Held að hann hafi ekkert fattað hvað ég átti við, en þá var einmitt tilgangnum náð.

En aftur að kokteilsósunni. Ég var út í matvörubúð áðan og var eitthvað að skoða tómatsósuna (eins og Mr. Burns gerði eitt sinn), og þá flaug mér allt í einu til hugar að það væri heillaráð að kaupa líka mæjónes og sinnep og búa til kokteilsósu. Ég ákvað að grípa fyrsta mæjónesið sem ég sá, og á meðan höndin nálgaðist dolluna sá ég að þetta var fitulítið mæjónes. Fyrstu sekúndubrotin var mér sama, en þá birtist mér engill á öxl, hann var rauðbirkinn, klæddur í svarta CAT úlpu og hélt á glasi með landakaffi. Hann var ekki lengi að sannfæra mig um að fitulítið mæjónes væri aðeins fyrir konur og listamenn, og ég snéri af villu míns vegar og keypti það allra feitasta mæjónes sem ég gat fundið.

Ég veit að þið eruð örugglega flest að huga að Laufskálaréttarballinu en ég treysti Hr. Tobíasi fyllilega fyrir því að þetta ball verði einstaklega leiðinlegt fyrir alla gesti. Í staðinn fyrir að vera á balli verð ég að læra fyrir próf í líffærafræði á mánudaginn. Það verður prófað þrisvar fyrir lokaprófið, og ef maður fær yfir 75% á þessum þremur prófum sleppur maður við beinahlutann á verklega prófinu, þarf þá einungis að gera grein fyrir vöðvunum. Á síðasta ári voru aðeins 2 af 100 nemendum sem náðu þessu, og ég er að spá í að vera ekkert að standa í því að komast í þennann hóp, ég er alveg nógu einstakur fyrir.

Þar til síðar

Mjólk er góð... bara ekki í Hungary

2008-09-25T16:48:00.002Z

Godt aften mine damer og herrer

Svo ég komi mér nú bara beint að efninu, þá getur sá hinn sami og vill flytja inn mjólk frá evrópu til Íslands fengið að smakka mjólkina hérna í Ungverjalandi. Málið er nefnilega það að þessir leppalúðar hita mjólkina upp í 135°C áður en þeir tappa henni á fernurnar. Þeir kalla þetta UHT hérna, ég tók eftir því þegar ég var í Finnlandi að þeir kalla þetta ultrapaströriseringu. Mjólkin endist um 2 mánuði í óopnuðum umbúðum, enda er svona G-mjólkur bragð af henni, ekki gott. Reyndar fann ég lífræna mjólk um daginn, hún endist nú ekki nema þessa hefðbundnu viku eða eitthvað svoleiðis, hún er vissulega skárri, en ekki alveg jafn góð eins og heima. Svo er nú eitt, feitasta mjólkin sem hægt er að finna er ekki nema 3,5% fita, nánast allt eins hægt að drekka vatn. Hún var nú skárri mjólkin sem ég fékk í Sólheimum í Sæmundarhlíð í vor, minnir að Valdi hafi sagt að hún hafi verið um 4,7% fita. Svo síðast en alls ekki síst, þá er mjólkin mun dýrari en heima, meðalverðið á G-mjólkinni er svona 280-340 HUF, sem er um 150-180 kr., og lífræna mjólkin kostaði yfir 200 kr. Þar hafið þið það

Svo skulu landsmenn nær og fjær, til sjávar og sveita, stilla á Rás 1 kl. 9.05 í fyrramálið að íslenskum tíma, því þá er Óskastundin með Gerði G. Bjarklind og ég lofa að einhverntímann í þættinum kemur svolítið skemmtileg kveðja.

Þar til síðar

Tímans þungi niður.

2008-09-22T19:43:00.003Z

Jó estét

Sjá dagar koma, ár og aldir líða sagði skáldið forðum en mánuðirnir líða einnig og í dag er einmitt mánuður liðinn síðan ég steig fyrst fæti á ungverska grundu, ungur saklaus drengur frá hjara veraldar. Það liggur kannski í augum uppi að ég hef aldrei verið jafn lengi frá Fróni, 3 vikur var gamla metið. Það er ýmislegt sem maður veltir fyrir sér á svona tímamótum, s.s. hvort þetta hafi verið lengi að líða og hvað sé öðruvísi við manns daglega líf, hvers maður saknar og hvort það sé eitthvað sem er betra en heima.

Hefur þetta verið fljótt að líða, tja... ekkert fljótar held ég en að vera heima, enda líður tíminn almennt hratt á gervihnattaöld. Það sem er kannski mesta breytingin á mínu daglega lífi hérna að nú snýst ekki hver einasti dagur ekki um leikinn sem er framundan á fimmtudaginn, og það er mjög sérstakt, en venst alveg örugglega eins og allt annað. Auðvitað saknar maður ýmislegs heiman að, fjölskyldu, vina (nema þá Tobíasar, hann er svo djöfull leiðinlegur) og t.d. þegar ég ligg stundum upp í sófa þá væri ég alveg til í að Breki myndi á mjög lymskulegann hátt troða sér upp í sófa og láta mig klappa sér. En það sem mér finnst kannski skrítnast er að ég er ekki búinn að sjá neitt landslag í heilann mánuð, nema þá í þessi 2 skipti sem ég hef farið upp á Géllert hæð. Maður lítur út um gluggann og sér bara hús og götur. Einmitt þegar ég er í tíma, og þarf eitthvað að láta hugann reika, þá get ég ekki horft á neitt út um gluggann nema skólalóðina og hús, á Hvanneyri gat ég horft út Borgarfjörðin ef ég var í Nýja skóla, nú eða Hauk að leika sér á dráttarvél ef að maður var í tíma út á Bút.

En hvað um það, á laugardaginn fékk ég það á tilfinninguna að eitthvað væri að gerast. Það voru svona heldur fleiri lögregluþjónar- og bílar á ferðinni, og þegar ég ætlaði að komast inn í verslunarmiðstöðina þá var mér meinaður inngangur (sé svo eftir því að hafa bara ekki tekið tjakkinn á lögguna). Svo þegar ég var að labba heim sá ég að það var búið að loka Andrassy götunni, sem er aðalgatan í borginni, þyrlur farnar að sveima og ég veit ekki hvað og hvað. Svo þegar húma tók að kvöldi lagði ég af stað yfir til Ölrúnar og Söndru. Göturnar okkar liggja samsíða, svona nokkurn veginn frá NV til SA og einungis ein gata á milli okkar. Svo þegar ég er kominn á götuna þeirra og tek vinstri beygjuna, þá sé ég að það eru nokkur hundruð svartklæddra manna að nálgast mig, veifandi ungverska fánanum og kyrjandi söngva. Ég gekk í áttina að þeim til að sjá hvort ég kæmist ekki mína leið í gegnum þvöguna..... en þegar ég sá að það voru einhverjir að fremstu mönnum þarna með andlitin hulin ákvað ég að snúa við. Brá ég þá á það ráð að koma inn á Izabellu-götuna aðeins neðar og vera þá vonandi kominn bakvið mótmælin. Það gekk svo sem upp, nema að við gatnamótin þurfti ég að bíða eftir að margir tugir óeirðalögregluþjóna gengu framhjá mér, og þeir gengu bara svona hálfan metra frá mér, fannst það svolítið svalt. Þyrlur sveimandi fyrir ofan með kastar í gangi og ég veit ekki hvað og hvað, og þá datt mér í hug "hva, bara hundar og læti". En ég hafði það loksins að komast mína leið, en verð að viðurkenna að þetta fannst mér lífga ótrúlega upp á lífið og tilveruna.

Set hér inn mynd af hetjutorginu, sem mér finnst vera mjög fallegt.

Þar til síðar

Ég bara varð að henda þessu inn

2008-09-20T11:29:00.000Z

Kaupfélag Skagfirðinga (KS) hefur sent frá sér yfirlýsingu þar sem þeir staðhæfa að þeir greiði sauðfjárbændum hæsta meðalverð fyrir dilkakjöt á yfirstandandi sláturtíð, auk þess sem þeir geti í krafti samstarfssamnings við Bónus tryggt neytendum lægsta verðið á lambakjöti. Í tilkynningunni kemur fram að hækkun KS nemi 22,6% milli ára, að meðalverð til sauðfjárbænda sé frá kr. 400,49 fyrir kílóið, án virðisaukaskatts.Ennfremur segir í tilkynningunni orðrétt:Samkvæmt upplýsingum frá Markaðsráði kindakjöts fengju bændur um 80 milljónum króna meira fyrir afurðir sínar í haust, ef aðrir sláturleyfishafar greiddu sama verð til bænda og KS gerir.

Þar til síðar

Don´t call it a comeback

2008-09-18T16:14:00.007Z

Já góða kvöldið

Ef að einhver hafði áhyggjur af því að efstu deildir körfuboltans yrðu án einhvers af Sólheimafólkinu, þá þarf sá hinn sami ekki að hafa neinar áhyggjur. Síðsumars fór Stínu systir að leiðast þófið, tók fram skóna og hefur drævað til vinstri síðan þá (nú fæ ég enga jólagjöf). Svo bárumst mér til augna skilaboð einmitt frá áðurnefndri Stínu um að framkvæmdastjóri Lýsingar, Arnar Snær Kárason hafi mætt á sína fyrstu æfingu í gær. Sjálfsagt má rekja það til þess að nú er farið að hægast svo um á fjármálamörkuðum að kallinn er farinn að hafa meiri tíma til að eyða í vitleysu (- 2 jólagjafir).

Ég kíkti inn á kki.is, og þar segja gögnin, eins langt og þau ná, að Stína hafi byrjað 1993 að spila, að vísu vantar alveg árið 1992. En það eru allavega 15 ár and still going strong hjá okkur. Ég nenni nú ekki að taka saman hvað leikirnir eru orðnir margir, það er kannski eitthvað sem Rúnar Birgir getur athugað meðan hann networkar sig í hel.

Ætli tilþrifin í vetur verði ekki eitthvað lík þeim sem sjást á myndinni hér fyrir ofan.

Þar til síðar

Stíflan brostin og það er stórflóð

2008-09-15T11:04:00.004Z

Jú góðann daginn gott fólk

Hlutirnir hafa gerst, ég er kominn með netið heima hjá mér og er ekki réttast að byrja á þeim hluta sögunnar um fyrstu vikurnar hérna í Budapest.

Þetta byrjaði nú ekki vel, tölvunni minni var stolið á Kastrup, sjálfsagt er einhver Bauninn að skemmta sér yfir öllum Karlakórslögunum mínum og kennslumyndbandinu hans Steingríms um hvelltamningar. Eftir að hafa gefið upp vonina um að Gráni gamli myndi finnast keypti ég mér nýja tölvu, en þá var brasið það einungis var hægt að kaupa tölvur með ungverska windows, þannig að ég keypti tölvu án stýrikerfis og eftir nokkra daga fann ég búð sem gat sérpantað fyrir mig windows á ensku. Þegar það kom 2 dögum síðar var ég tilbúinn til þess að fá netið í íbúðina og talaði við netfyrirtækið. En þegar kallinn frá þeim kom til að tengja komst hann að því að verktakinn sem gerði bygginguna upp hafði gleymt að setja kapal inn í íbúðina og því ekkert hægt að gera. 2 dögum síðar komu 2 menn frá verktakanum og lögðu kapal inn í íbúðina og stuttu síðar kom kallinn frá netfyrirtækinu aftur. Þegar hann var búinn að tengja módemið komst hann að því að það var eftir að installa netkorti í tölvuna mína og því ekki hægt að klára dæmið. Daginn eftir labbaði ég í búðina þar sem ég keypti stýrikerfið og spurði hvort þeir gætu ekki hjálpað mér. Það var nú minnsta málið fyrir strákana í Macropolis og þeir rukkuðu ekki einu sinni fyrir það með því skilyrði að næst þegar ég keypti tölvu þá myndi ég versla af þeim, að sjálfsögðu lofaði ég því. Svo var málið að hringja í netfyrirtækið og klára dæmið og eftir smá japl, jaml og fuður hefur tekist að koma netsambandinu á.

Fyrstu dagarnir í Budapest voru nokkuð túristalegir. Ég gerði varla annað en bara að labba um og skoða. Alveg hreint mögnuð borg. Hendi kannski inn nokkrum myndum af því þegar ég var upp á hæðinni fyrir ofan borgina í ljósaskiptunum í kvöld, sem var helvíti flott.

Skólinn byrjaði með pompi og prakt og þetta er nú bara helvíti gaman, t.d. þá skárum við upp hund um daginn. Auðvitað er einn og einn áfangi sem er leiðinlegur og virkar hálf tilgangslaus, en það er nú líklega alltaf svoleiðis fyrstu annirnar. Sem betur fer er ég nú ekki eini Íslendingurinn á svæðinu eins og ég hélt. Það eru 2 stelpur á fyrsta árinu, sem heita Sandra og Ölrún og svo 1 á öðru ári sem heitir Inam. Þess má til gamans geta að Ölrún er Skagfirðingur að uppruna, nánar tiltekið af Nikkaraættinni.

Það er körfuboltalið í skólanum sem æfir tvisvar í viku, tekur meira að segja þátt í einhverri háskóladeild þannig að þegar seasonið byrjar verður bara æft einu sinni í viku og spilað einu sinni í viku. Ég held að ég láti það alveg nægja fyrsta árið því ég er í svo miklum skóla þannig að það er betra að færast ekki of mikið í fang. Áður en ég mætti á fyrstu æfinguna þurfti ég að kaupa mér skó því mér tókst einhvern veginn að taka bara annann körfuboltaskóinn minn með út (ekki dæmigert), pabbi fann hinn í gær undir rúminu í Raftahlíðinni.

Næturlífið er nú bara nokkuð gott, búinn að fara út í nokkur skipti og sjá mismunandi staði, t.d. einhvern þann sveittasta stað sem ég hef á ævi minni komið á. Þannig var nefnilega málið að þegar ég kom heim úr skólanum á föstudagskvöldið þá beið mín sms frá nafna mínum Jóhanni Axel Guðmundssyni sem sagði að Árni í Útvík og Jenni á Fjalli væru staddir í Budapest. Við mæltum okkur mót, sötruðum öl og fórum inn á stað sem heitir Old Man´s pub. Það var eins og að hlaupa á vegg, slíkt var andrúmsloftið mettað af reykingum og svita. Sandra og Ölrún sameinuðust okkur litlu síðar og það var ýmislegt skeggrætt, meðal annars Nikkaraættin.

Síðastliðið laugardagskvöld fór ég síðan aftur út. Fór fyrst á einhvern bar sem var í svo gömlu húsnæði að það minnti mig helst á barinn í From Dusk till Dawn. Endaði svo á einhverjum klúbb sem var bara helvíti fínn, er líka ekki langt frá íbúðinni minni. Mun örugglega koma þangað aftur.

En á heimleiðinni á aðfaranótt sunnudags fór af stað atburðarás sem er tilefni af hinni löngu sögunni um veru mína hér í Budapest og hlustið nú vel börnin góð.

Á heimleiðinni ákváðum ég og stelpurnar að fara inn á Kebab stað og fá okkur að éta. Heimgangan frá þeim stað er ekki meiri en 10 mínutur, en á þessum 10 mínutum tókst mér að týna veskinu mínu. Í veskinu var að sjálfsögðu visa frændi, sem þýddi það að ég var orðinn peningalaus út í Budapest. Það tekur eðlilega þónokkurn tíma að fá nýtt kort og nú voru góð ráð dýr. Eftir að hafa hugsað lengi hvernig ég ætti að koma mér út úr þessari klípu fékk ég hugmynd, en sú hugmynd krafðist skjótra vinnubragða. Ég mundi nefnilega eftir því að í Raftahlíð 55, Sauðárkróki, Íslandi lá debetkortið mitt á gólfinu.... og vinkona hennar Ölrúnar á leiðinni til Budapest í dag (mánudag). Upphófst þá mikið dæmi og var atburðarásin eitthvað á þessa leið:

Hringt í Gamla Sólheimahundinn, hann var þá staddur í Hrútafirði á heimleið, sagðist ætla að finna kortið er hann kæmi heim og reyna að finna far fyrir það suður.

Hringt í Sprittarann, spurt hvort hann viti um ferð suður. Hann bendir á að tala við Kónginn.

Hringt í Kónginn, hann er þá staddur á Hótelinu ásamt Logan og Hr. Tobíasi (sem gerði ekki annað en að vera með kjaft). Kóngurinn kvaðst ætla skoða málið.

Hringt í Lilju vinkonu hennar Ölrúnar og spurt hvort hún geti ekki tekið kortið með sér út. Það var nú minnsta málið.

Kóngurinn hringir. Hann er búinn að finna ferð með Jónínu í Jaðri.

Hringt í Gamla Sólheimahundinn. Staðan gefin upp og hann er staddur á Miðfjarðarhálsinum á fullu röri á heimleið.

Þá þarf að finna einhvern í borg óttans til að taka við kortinu frá Jónínu og koma því til Lilju. Voru þá systkyni mín ræst út og framkvæmdastjóri Lýsingar tók verkið að sér.

Hringt í Gamla Sólheimahundinn. Hann er kominn heim, búinn að finna kortið og bíður eftir því að það verði sótt.

Sprittarinn fer svo í Raftahlíðina og nær í kortið, kemur því til Jónínu sem fer með það suður, hittir Arnar, sem fer með það til Lilju og þegar þessi orð eru skrifuð er Lilja líklega stödd í Köben og bíður eftir fluginu til Budapest sem lendir um 10 leytið í kvöld.

Þar hafið þið það, þetta tókst með samstilltu átaki og as we say in Iceland you know "þetta reddast". Mórallinn með þessari sögu er nú sá að það er gott að eiga góða að, en það skal tekið fram að Hr. Tobías átti engann þátt í þessari aðgerð, enda er hann ömurlega leiðinlegur maður, sérstaklega í víni.

Svona rétt í lokin þá ætla ég að skella inn myndbandinu um Verslunamannahelgina 2008, njótið vel.

Þar til síðar

Tilkynning

2008-04-27T05:01:00.001Z

Ég vil taka það fram að Tobías er dauður.

Þar til síðar

Grá hár

2008-04-11T18:56:00.003Z

Gott kvöld

Ég held að gráu hárunum eigi eftir að fjölga mikið þessa helgina. Það verða maraþonritgerðarskrif og ég er nú þegar orðinn frekar þreyttur á þessu og ákvað að taka mér kvöldmatarhlé.

Ég gleymdi að minnast á það síðast að það er þó einn möguleiki á að ég taki fram skónna þegar ég kem aftur til baka. Eftir miðnætti eitthvert kvöldið lofaði ég Ómari "Mr. Clutch" Helgasyni að ef hann getur troðið þegar ég kem aftur þá skuli ég spila eitt tímabil með honum og gefa honum kassa af bjór....... þannig að ég er ekki að fara að spila aftur.

Ein pæling samt, hversu viðeigandi var það að mitt síðasta verk inn á körfuboltavellinum var að fá villu?? Í tilefni af þessari pælingu þá athugaði ég hvað ég hef fengið margar villur um ævina, og niðurstaðan er 405 eða 2,5 að meðaltali í leik (þarna er úrslita- og bikarkeppni ekki talið með) sem er bara nokkuð gott. Ef ég reikna þetta svo yfir á mínutur þá fékk ég að meðaltali villu á 9 mínutna og 6 sekúndna fresti, þá miðað við tímann sem ég er inn á.

Leikum okkur svo aðeins meira. Tökum frá fyrsta tímabilið mitt, því þá spilaði ég svo lítið. Þá voru villurnar 397 eða 2,7 að meðaltali í leik, og leiktími á milli villna 9 mínutur og 3 sekúndur.

Tökum svo tímabilið 2002-2003, þá náði ég þeim áfanga að vera næst villuhæsti leikmaður deildarinnar. Villurnar urðu 78 eða 3,6 að meðaltali í leik og leiktími á milli villna 7 mínutur og 33 sekúndur. Þess má geta að aðeins einu sinni fór ég útaf með 5 villur.

Loksins hef ég fundið tölfræðiþátt sem ég skara fram úr, enda er drasl eins og stig, framlag og stoðsendingar bara fyrir kellingar með fínhreyfingar.

Þar til síðar

Jæja

2008-04-07T13:25:00.002Z

Ég heilsa frá Hvanneyri, frekar þreyttur.

Kom bara að norðan í hádeginu. Fór þangað á laugardaginn og nennti ómögulega að fara til baka í gær sökum almenns slappleika. Ástæðan fyrir slappleikanum var sú að ég fór á stórgott ball á Mælifelli þar sem mikið var af góðum mönnum og að sjálfsögðu var klósettsöngur og allt tilheyrandi.

Það vita sjálfsagt flestir ástæðuna fyrir því að ég leyfði mér að fara norður og lyfta glösum.... en á fimmtudaginn síðasta þá duttum við Skallagrímsmenn út úr Íslandsmótinu og erum kominr í sumarfrí. Fyrir mig var þetta sérstaklega merkilegt sökum þess að þetta var nú minn síðasti leikur hérlendis. Næsta haust mun ég fara alla leið austur til Ungverjalands og setjast á skólabekk og vera þar næstu 4 og 1/2 árin og geri nú ekki ráð fyrir því að reima á mig skóna þegar ég kem til baka. Árin urðu því 8 og leikirnir í öllum keppnum tæplega 250 ef ég hef talið rétt. (Þetta skrifaði ég á mánudaginn en varð svo frá að hverfa sökum mikils hausverks og hef ekkert komist í að klára færsluna síðan þá...)

En höldum áfram þar sem frá var horfið:

Ég vildi bara þakka öllum þeim sem mætt hafa á leik með mér kærlega fyrir stuðningin í gegnum árin og sérstaklega þeim sem mætt hafa sökum þess að ég hafi verið í öðru hvoru liðinu ef svo má að orði komast. Sem dæmi má nefna að í síðasta leiknum voru mæðgurnar í Múlakoti að sjálfsögðu mættar, en einnig Litli-Per, Villi Special og Anna Lilja og Per jafn hlédrægur að vanda á leikjum.

ÍR-ingar voru nú seigir að vinna í Toyotahöllinni, en betra er að fagna ekki of snemma, þeir unnu nú líka fyrsta leikinn fyrir 3 árum og töpuðu næstu 3 með 25 stigum eða meira. En annars finnst mér skemmtilegt að nokkur íþróttahús séu farin að heita eftir styrktaraðilum, a.m.k. ef ekkert betra nafn er til en Íþróttahús Keflavíkur. Ég sagði nú við pabba um daginn að Kaupfélagið ætti að styrkja íþróttahúsið á Króknum og skíra það Geirmundarstaði. Er einhver með góða tillögu að nafni á Íþróttahúsið í Borgarnesi, mér dettur ekkert í hug.

Í gær byrjaði ég að gera lokaverkefnið mitt upp tölfræðilega í hinu stórskemmtilega forriti Minitab.... sem er æði. Þetta er svo ótrúlega gaman að ég verð að kveðja ykkur í bili og halda áfram að vinna í þessu.

Þar til síðar

Í kvöld er ég sigli á sænum....

2008-03-27T10:44:00.003Z

Sælt veri fólkið

Ég get nú því miður ekki sagt margar sögur af páskunum hjá mér. Ég fór reyndar í fjósið í Þverholtum á Mýrum og hef nú aldrei séð jafn margar mjólkurkýr samankomnar í einu á minni stuttu ævi. Tók eftir því að smiðirnir frá Landstólpa voru ennþá að vinna upp vitleysuna eftir Einar Kára frá því í sumar. Það var Austurrískur dýralæknir með í för og honum fannst einna merkilegast að sjá forystuféð á bænum, var hissa á að þetta kyn hafði ekki verið rannsakað meira.

Fór norður á laugardaginn og laugardags- og sunnudagskvöld voru tekin í það að horfa á bandaríska háskólakörfuboltann, en úrslitakeppnin er farin af stað þar og mikið af skemmtilegum leikjum á að horfa. Fyndið að hugsa til þess að margir af þessum strákum eru 5-6 árum yngri en ég og sennilega munu nokkrir fara að spila í NBA á næsta ári fyrir einhverjar hundruðir milljóna. Finnst það hálf súrrealískt að hugsa til framhaldsskólaáranna og setja mig í þeirra spor, en þegar ég var á þessum aldri var meira hugsað um hvort Land-Roverinn kæmist í lag fyrir næsta ball eða eitthvað álíka gáfulegt.

Ég skora á alla sem hafa möguleika á að skoða trukkinn hans Steingríms sem er loksins kominn á ról, hann er meira brettakantar með bíl heldur en eitthvað annað.

Læt fylgja með skemmtilega mynd sem ég tók um daginn fyrir norðan, greinilega allt klárt fyrir heyskapinn í Lýtingsstaðahreppnum.

Þar til síðar

Skín við sólu Skagafjörður

2008-03-10T18:05:00.002Z

Komið þið öll margblessuð og sæl

Titillinn á þessari færslu á svo sannarlega vel við. Renndi norður í morgun til að fara í fjósskoðanir, sem eru komnar aftur á dagskrá eftir að próf eru búin og veðrið var vægast sagt gott í dag, sólin sló silfri á voga og mínir heimildarmenn í Borgarfirði sögðu að sjá mætti jökulinn loga þar. Það fattar örugglega enginn hvaða lag ég vitnaði í lok síðustu setningu en hvað um það.

Prófin eru búin og ef mér hefur ekki gengið þeim mun verr, þá á ég einungis eftir einn áfanga og svo lokaverkefnið fram í maí og þá er ég bara búinn, þá er ég orðinn háskólamenntaður aumingi að sunnan sem hljómar reyndar ekki vel. Ég get kannski frekar titlað mig að vestan, það hljómar mun betur.

Þar til síðar

Óveður

2008-03-04T16:31:00.002Z

Sælt veri fólkið.

Sá að það var verið að vara við óveðri milli Borganess og Hvanneyrar á mbl.is. Ég sit nú bara hérna inn á bókasafninu og hef það náðugt, set hins vegar allt mitt traust á að rauða eldingin skili mér heim á eftir. Verð að viðurkenna það að ég er orðinn þónokkuð spenntur fyrir vorinu og að snjóa leysi, því þá fara hinir gríðarlegu kraftar Höfðingjans vonandi að leysast úr læðingi. Einar Sveinbjörnsson veðurfræðingur spáir að um 10. mars fari að hlýna verulega og þar sem hann er Framsóknarmaður er engin ástæða til annars en að taka hann trúanlegann.

Hafþór Ingi Gunnarsson er nýjasti kaflinn í meiðslasögu Skallagríms. Tók það saman af gamni mínu að í 19 leiki það sem af er tímabili hefur vantað 1 eða 2 af 7 mínutuhæstu mönnum liðsins þar sem ég trjóni að sjálfsögðu á toppnum.

Ég vil að lokum óska Heiðari Árna Baldurssyni til hamingju með að hafa veitt músina í þvottahúsinu.

Þar til síðar

Próf

2008-02-25T12:24:00.002Z

Komið þið sæl, vér heilsum úr Andakílnum á fallegum og björtum vetrardegi.

Ég vil byrja á því að óska Snæfellingum til hamingju með bikarmeistaratitilinn..... og ekki orð um það meir.

Ég skellti mér á þorrablót þeirra Lunddælinga upp í Brautartungu á laugardagskvöldið. Var það hin besta skemmtun en Helgi á Snartarstöðum á tvímælalaust atriði kvöldsins er hann las upp ljóðið "Slappaðu af" sem Flowers fluttu hér um árið. Rúnar Júl og synir sáu um dansiballið og voru bara helvíti þéttir, þó svo að hléin hafi verið 2. Heiðar mágur fór á kostum og hreinlega átti dansgólfið, slíkar voru sveiflurnar.

Ég er nú svona eitthvað að komast á skrið í boltanum, formið var nú ekki alveg upp á 10 þegar ég byrjaði aftur, Sveinbjörn Eyjólfsson kom með þá leiðinlegu staðreynd við mig á blótinu að Skallagrímur er búinn að tapa öllum leikjum síðan ég byrjaði aftur... kannski er betur heima setið en af stað farið. Nei andskotinn.

Það er prófatíð, alveg ágætt að fara í hana eftir strembna önn í skólanum. Ég held ég nefni það í hverri prófatörn hversu merkilegt það er að maður hefur allt í einu svo mikinn tíma til að gera eitthvað annað en að lesa bækur. Það verður reyndar kannski öðruvísi núna þar sem prófin eru fleiri en venjulega. Svo þegar þau eru búin tekur við lokaverkefnið og einn áfangi í landbúnaðarbyggingum... mikið óskaplega verður það ljúft.

Þar til síðar

Allt á floti... í Bakkakoti hahaha

2008-02-19T09:40:00.002Z

Jú góðann dag

Svolítið þreyttur þriðjudagur að hefjast. Ég fór norður í gær, með þeim tilgangi að heimsækja 2 bæi og það sem merkilegra var, að sækja Höfðingjann og fara með hann suður til að láta lækna hann. Ég fékk því lánaðann Jaxlinn hans Baldurs og kom að Syðstu-Fossum rétt fyrir 7 til að sækja kerruna hans Unnsteins. Það gekk nú heldur brösulega að komast af stað því kerran var föst í bremsu, en með hjálp WD-40 og þolinmæði þá losnaði bremsan fyrir rest. Ég skellti mér svo niður í Nesið til að setja olíu á Hrútinn og ætlaði svo Borgarhreppinn norður. En nei þegar ég kom í Borgarnes komst ég að því að vegurinn við Svignaskarð var farinn í sundur þannig að ég þurfti að fara til baka og fara norður Borgarfjarðarbrautina.

En norður komst ég, heimsótti 2 góðbændur og skellti Höfðingjanum svo upp á kerruna og hélt af stað. Þar sem ég fór aldrei upp fyrir 70 þá tók það mig um 6 tíma að komast til Reykjavíkur, með smástoppi í Múlakoti að vísu. Ég held að það sé alveg óhætt að segja það að Höfðinginn hafi nú einhvern tímann verið sneggri á milli Skagafjarðar og Reykjavíkur, en það er nú önnur saga.

En Höfðinginn er sem sagt kominn inn á göngudeild og verður því vonandi kominn á götuna innan tíðar.

Þar til síðar

Biðin er á enda

2008-02-14T10:41:00.001Z

Það gerist í kvöld gott fólk.... það gerist í kvöld

Þar til síðar

Nú horfið Norðurland

2008-02-07T22:24:00.000Z

Heilt og sælt ágæta fólk.

Þetta er sennilega fyrsta færslan í ansi langann tíma sem skrifuð er úr Skagafirðinum. Lokaverkefnið mitt er málið þessa dagana, bændur eru heimsóttir og kýr skoðaðar. Ég slumpaði á það að þegar verkefninu verður lokið verð ég búinn að skoða tja.... 720 kýr.... tvisvar.

Nú er sú stund liðinn upp að UMF. Skallagrímur hefur spilað sinn síðasta leik þetta árið án mín. Næsta fimmtudag brestur á með byljum og ég fæ loksins að snúa aftur og sá tími liðinn að einhverjir hottintottar fylli búning númer 4. Í dag eru liðnir 75 dagar síðan ég hreyfði mig síðast í körfubolta, gamla metið mitt yfir vetrartímann var sennilega 2 dagar, þannig að á fimmtudaginn næsta verða liðnir 82 sem gerir aukningu upp á 41.000%, ekki amaleg ávöxtun það.

Það er aðalfundur hjá ungum Framsóknarmönnum á morgun og svo þorrablót í íþróttahúsinu á laugardaginn, þannig að lykilorð þessarar helgar eru Skagafjörður, kýr, Framsóknarflokkurinn og skagfirsk skemmtun. Það vantar bara eitt og þá væri ekkert betra....

Þar sem Breki gat ekki látið mig í friði meðan þessi færsla var samin fær hann mynd af sér í lokin.

Þar til síðar

Nú er það svart, allt orðið hvítt

2008-01-30T14:02:00.000Z

Komið þið öll blessuð og sæl

Ég er staddur hér út í gamla skóla og horfi út um gluggann, og sé alhvítann Borgarfjörðinn þá kemur mér til hugar að Baldur í Múlakoti fékk fiðring í gær og keypti sér vélsleða. Þegar ég frétti af þessu fór ég að rifja upp hvenar ég prófaði vélsleða síðast. Það var nú einhvern tímann er ég bjó á Sólheimum, því þegar Arnar var á grunnskólaaldrinum hafði hann mikla dellu fyrir vélsleðum, ásat Kobba á Borgarhóli og Dóra á Kúskerpi.

Einn af sleðunum sem hann átti var Polaris 340. Einhvern daginn þegar ég og Mæja vorum komin heim á undan Arnari (þá vorum við í Akraskóla, hann í Varmahlíðarskóla) þá fengum við þá mögnuðu hugmynd að stela sleðanum og fara á honum niður á stóru sléttu og þenja aðeins. Ég man ennþá hvað mér þótti ótrúlega gaman að botna sleðann fram og aftur um túnið. Ég man líka ennþá hversu ofboðslega hræddur ég var þegar við föttuðum að við höfðum gleymt að fylgjast með tímanum og sáum að Arnar var kominn heim úr skólanum. Sú hræðsla var ekki ástæðulaus því við fengum frekar miklar skammir frá stóra bróðir þegar við dóluðum heim að bæ skömmustuleg, ekki var Polarisnum stolið oftar þennann veturinn.

Svona þegar litið er til baka skilur maður það svo sem alveg, ekkert mjög gáfulegt að 8 ára drengur sé að þeysa svona um grundir, hjálmlaus í þokkabót með 10 ára gamla systur sína aftan á.

En þetta var rosalega gaman meðan á því stóð.

Þar til síðar

Þeytingur

2008-01-21T13:01:00.000Z

Góðann daginn og gleðilega vinnuviku

Það er búinn að vera hálfgerður þeytingur á mér síðan síðast, byrjaði á því að vera fyrir norðan um þarsíðustu helgi, til hvers, jú auðvitað að skoða kýr. Lokaverkefnið mitt hér í skólanum gengur út á að ég fari í Skagfirsk fjós og skoði kýrnar þar. Það sem var einnig skemmtilegt við þessa ferð var að ég skrapp á leik hjá mínum gömlu félögum á föstudagskvöldinu, og ef mér skjátlast ekki þá var þetta fyrsti meistaraflokksleikur Tindastóls sem ég horfi á úr stúkunni á Króknum síðan vorið 1999, því árið eftir þá var ég á ritarborðinu ásamt Matta Rúnars og svo var maður kominn á bekkinn eftir það.

Skaust svo dagsrúnt á fimmtudaginn síðasta, fór á Hól í Sæmundarhlíð og Marbæli, þar sem ég sýndi gamalkunna takta og gleymdi stígvélunum mínum á Marbæli, vel gert Axel.

Á föstudaginn fór ég til Reykjavíkur að taka enskupróf og á laugardaginn var komið að því að fara á suðurlandið, því ég og Sóley áttum pantaðann kvöldverð og gistingu á Hótel Rangá. Sú upplifun var mjög góð, að sjálfsögðu stóð lambakjötið upp úr eins og við var að búast, og að ég fékk bjórinn minn frítt. Á sunnudaginn ákváðum við að taka smá rúnt í Fljótshlíðina, því Steingrímur sagði mér að þar væri fegursta sveit suðurlandsundirlendisins og þótt víðar væri leitað. Í stuttu máli þá var Fljótshlíðin svona..... já hún var bara eins og hún er. Við skulum allavega segja að ég skil núna af hverju Steingrímur er svona flatur og leiðinlegur í skapinu.

Eitthvað segir mér að JR hafi verið aðeins kenndur þegar hann kommentaði undir síðasta póst en ef hann kemur með eina línu í viðbót þá skal ég reyna að botna þetta fyrir hann:)

Læt fylgja með mynd af svartsíðóttri kú.

Þar til síðar

Mánudagur til mæðu

2008-01-07T22:41:00.000Z

Þetta byrjaði sem góður dagur, ég gekk út í morgunsárið, horfði yfir Andakílinn og mynni Lundarreykjardals. Veðrið var stillt, með hvítri föl yfir foldinni. Gamli Sorrý Gráni var ræstur og malaði undursamlega að vanda. För okkar var heitið á Hvanneyri þar sem lá fyrir að taka upptökupróf í dýrafræði hryggleysinga. Ég hitti Steingrím upp á loftinu í Nýja-Skóla. Hann var eldrauður og nývaknaður og gott að sjá að þessar helstu stoðir í tilverunni breyttust ekki í jólafríinu.

Prófið gekk eins og í sögu, hver fróðleikurinn af öðrum um krabba, lindýr og æxlun ánamaðka spratt fram af blýpennanum. Það gekk einnig vel að halda árámótaheitið mitt sem er að verða skipulagðari á nýju ári og varð margt úr verki fram eftir degi. Ég og Sóley héldum svo síðdegis í höfuðborgina, því meiningin var nú að hitta sérfræðing út af fætinum á mér.

Ég byrja á því að fara í móttökuna í röntgendeildinni í Orkuhúsinu, skrái mig þar inn og fæ svo að fara á snyrtinguna meðan ég bíð eftir því að vera kallaður inn. Þegar ég kom til baka af snyrtingunni þá var konan í móttökunni ekki á svæðinu, en kemur eftir smástund, horfir undrandi á mig og segir ,,hva, bara búinn?". Þar sem ég var ekki viss hvort hún ætti við klósettferðina eða myndatökuna þá ákvað ég að þegja og bíða eftir nánari útskýringu, hún átti víst við myndatökuna.

Eftir myndatökuna fór ég upp á fimmtu hæð til að hitta sérfræðinginn. Hann var kominn með myndirnar í tölvuna sína og fer að sína mér þær. ,,Já þetta lítur bara vel út, grær allt saman rétt og vel", fór þá að lyftast brúnin á mínum og brosið orðið ansi breitt. Síðan leggst ég á bekkinn og Sérfræðingurinn spyr hversu langt er síðan ég brotnaði. ,,Rétt rúmar sex vikur" svara ég og hann svarar strax ,,já svona stutt", eitthvað dofnaði brosið en ég var engann veginn undirbúinn fyrir það sem kom næst:

,,Þú verður orðinn góður eftir sex vikur"

Sex helvítis vikur var staðreyndin, en lítið hægt að gera en að taka því eins og hverju öðru hundsbiti. Þetta er víst bara standard tíminn fyrir svona brot. Blóm og kransar eru afþakkaðir en þeir sem vilja minnast mín geta gefið mér pening svo ég geti keypt mér eitthvað skemmtilegt.

Boðskapurinn er: Aldrei að tala við þessa sérfræðinga fyrir sunnan.

Þar til síðar

Síðasti söludagur

2007-12-30T20:26:00.000Z

Heilt og sælt ágæta fólk og gleðilegt árið.

Of langt síðan síðast, einhver leti hefur gripið mannskapinn og því lítið verið sett inn.

Lítið bólar á framförum í fætinum á mér, fer í myndatöku á eftir og ef hún kemur ekki vel út þá er ég að spá í að biðja Baldur um að hjálpa mér við að setja borðabolta í staðinn fyrir beinið, það hlýtur nú að vera í lagi, en hann yrði nú líklega að vera ryðfrír.

Loksins get ég státað af einhverjum myndum úr Barcelonaferðinni góðu, og hér er tvímælalaust uppáhalds myndin mín. Hér sést ég bera mig saman við FIAT 600, ég veit reyndar ekki hvaða árgerð hann er en eins og sést væri sennilega frekar erfitt fyrir t.d. körfuboltalið að ætla ferðast um langar leiðir á slíkum úrvalsfák. Þess má geta að ég rúntaði um í þessum hjólastól þegar við skoðuðum þetta safn, nennti nú bara einfaldlega ekki að vera á hækjunum. Það var nefnilega ekki slegið mjög slöku við í skoðunarferðum, sem var orðið ansi lýandi á stundum. Sérstaklega var erfitt að fara upp í kastalann á hæðinni því þar var mikið upp í mót og allt mjög gamalt og því voru göturnar hellulagðar, og ekkert mjög sléttar né jafnar eftir nokkuð hundruð ára notkun.

Jólin og áramótin voru nú bara nokkuð góð. Þar sem ég er enn á batavegi þá þurfti ég ekkert að mæta á æfingar, og því hef ég nú bara ekki verið jafn slakur um jól í háa herrans tíð. Fór að vísu ekkert norður þar sem Gamli Sorrý Gráni er ekki í það góðu formi að hann komist á milli sýslna. En það stefnir nú í að ég verði þónokkuð í Skagafirðinum í Janúar og Febrúar þannig að þetta sleppur nú allt saman.

Fór nokkrar mjólkurferðir um jólin, sem var nú bara ágætt, svona rétt til að endurnýja kynnin við vestlensku kýrnar. Það var reyndar leiðinlega vont færi á annan í jólum sem gerði það að verkum að ferðin tók um 15 tíma, en mjólkin skilaði sér og það er fyrir öllu.

Læt hérna í lokin fylgja með mynd af þessum kastala í Barcelona sem ég náði að klöngrast upp í.

Þar til síðar

Á Spáni er.....

2007-12-10T13:23:00.000Z

.... Ekki gaman að vera á hækjum. Ég var nú orðin svolítið þreyttur í höndunum og vinstri fætinum á stundum. En það var vissulega vel þess virði, margt að sjá á þessum stað, verst að við gátum sennilega ekki séð nema helmingin af því sem hægt var að sjá vegna þess að sumir fóru hægar yfir en aðrir... nefnum engin nöfn. Skemmtilegast fannst mér að fara í þjóðminjasafn Katalóníu, því þar fékk ég afnot af hjólastól, og fann þennann forláta FIAT 600 sem var til sýnis, ég lék mér að því að rúlla hjólastólnum í svipaða stöðu og framsætin og komst að því að ef ég rétti úr fótunum þá náði ég framfyrir framdekkin.

Annars skil ég ekki þessa fýlu sem Spánverjar eru alltaf í, t.d. þegar ég var einu sinni að benda Sóley á eitthvað, og gleymdi mér aðeins og notaði hækjuna til þess þá var ég næstum því búinn að slá henni í einhvern gamlann Spanjóla og ég sagði nú bara úbbs og brosti en hann ætlaði að drepa mig með augnaráðinu.... skil ekki svona.

Próf eru yndislegur tími, eða eitthvað svoleiðis. Ég á nú að vera að læra fyrir próf í sauðfjárrækt en það er nauðsynlegt að hreinsa hugann aðeins áður en haldið verður áfram eftir matinn, sem var öllum á óvörum steiktur fiskur og grjónagrautur í mötuneytinu á Hvanneyri.

Ég vona það innilega að ég losni við gifsið á morgun. Orðinn alveg hundleiður á að geta ekki keyrt og þurfa að biðja aðra um að bera fyrir mig matinn inn í matsal.

Ég læt fylgja hér með fallega mynd sem ég tók einhverntímann í haust. Mér finnst hún vera svolítið listræn, múgavélin sem lokið hefur ævistarfi sínu, situr þarna gamalgróin og virðir fyrir sér mannlífið með yfirsýn yfir Lundarreykjadalinn og Andakílinn.

Smá viðbót frá því í gær. Ég gleymdi að henda inn spurningunni í Sambandsleiknum sem ég var búinn að finna upp á, en hún er svohljóðandi: Árið 1933 keypti Samband Íslenskra Samvinnufélaga frystihúsið Herðubreið í Reykjavík sem hluta af sístækkandi starfsemi þess. Hvaða starfsemi fer fram í þessu húsi nú á dögum?

Þar til síðar

Þá bregðast krosstré

2007-11-25T17:34:00.000Z

Ja nú segi ég farir mínar ekki sléttar.

Undanfarna daga hef ég staðið í andlegum undirbúningi fyrir ferð til Barcelona sem ég og Sóley erum að leggja í, nú bara á morgun. Ég var búinn að plana að vera duglegur að hreyfa mig, fyrst ég var að fá frí frá æfingum, og að sjálfsögðu að spígspora aðeins um stórborgina og sjá þessi helstu kennileiti sem Katalóníumenn hafa upp á að bjóða.

En nei.... á síðustu æfingunni fyrir ferð (í gær altsvo) þá var ég svo heppinn að fótbrotna þannig að þetta verður líklega eitthvað skrautleg ferð, ég leigi mér bara svona rafskutlu og sporta um á henni, nú eða að Sóley ýti mér í hjólastól. Sem betur fer verð ég líklega ekki gifsaður lengur en í 2 vikur þannig að kannski ætti ég að nota það sem afsökun fyrir því að geta verið í svona mánuð í Barcelona.

En allavega þá bið ég að heilsa ykkur fram á föstudag og farið varlega.

Þar til síðar

Fögur er foldin

2007-11-20T13:57:00.000Z

Góðann daginn gott fólk

Ég verð nú eiginlega að hlæja aðeins af fólki sem hafði bloggað um frétt á mbl.is þar sem sagt var frá því að hætt er að hleypa kúnum út á sumum róbótabæjum. Eitthvað segir mér að þetta fólk viti ekkert muninn á lausagöngu- og básafjósi. En hvort að ég sé hlynntur því að þeim sé ekkert hleypt út er kannski önnur saga og lengri.

Var svo duglegur að setja inn á netið nokkrar myndir af sauðfé, undir stendur hvaða litaafbrigði þær bera, og er það undir hlekknum "Sauðfjárlitir" í landbúnaðartenglunum. Þess ber að geta að sérlegur ráðgjafi og litadómari var Steingrímur Einarsson. Ef þið lumið á myndum sem þið mynduð vilja sjá þarna endilega hendið því á mig, og einnig ef um kúamyndir er að ræða, en hross eru óvelkomin.

Ég hef nú ekki ennþá komist í það að búa til nýjar spurningar í Sambandsleiknum, þannig að það verður að bíða aðeins.

Sá á karfan.is þar sem fjallað var um leik Njarðvíkur og Tindastóls að fréttaritara hefði þótt strax ljóst í hvað stefndi þar sem Tindastóll mætti einungis með 8 leikmenn. Ég man nú ekki betur en að í síðasta leik fyrir jól árið 2003 mættum við einmitt með einungis 8 leikmenn á skýrslu og einn af þessum 8 var Gamli Sólheimahundurinn. En sá leikur vannst nú og eftir leikinn lentu 3 leikmenn í hvoru liði í lyfjaprófi og hepppinn ég varð valinn og var eitthvað að spyrjast fyrir um hvernig hefði verið valið. Þá var mér tjáð að húsvörðurinn í Njarðvík hefði dregið út númerin og ég svaraði "já það eru náttúrulega góðar líkur á að verða fyrir valinu fyrst við vorum bara átta" þá svaraði lyfjaeftirlitsmaðurinn "já eða sjö, því við ákváðum nú að sleppa pabba þínum við að lenda í þessu". Hækkaði álit mitt á lyfjaeftirlitinu mikið eftir þetta.

Þar til síðar

Og það var rétt

2007-11-09T12:25:00.000Z

Hárétt hjá Sigríði Ingu, annað af þessum tveimur félögum var Kaupfélagið Fram á Norðfirði (Neskaupstað), hitt var Kaupfélagið Björk á Eskifirði.

Þetta félagatal sem ég er með er frá 1940, en sláturfélagið Örlygur hefur líklega ekki verið búið að ganga í Sambandið á þeim tíma. En Sigríður er komin með eitt stig og þá er það næsta spurning og er hún öllu þyngri.

Nefnið 3 af þeim 4 samvinnufélögum í Skagafirði sem voru félagar að SÍS árið 1940.

Þar til síðar.

Bændur slátra

2007-11-08T11:14:00.000Z

Mikil umræða hefur verið síðastliðin misseri um heimaslátrun bænda, og þessa sölu beint frá býli og allt það og tel ég nú að vel flestir kannist við þetta. Í nýjasta Bændablaðinu er viðtal við mann sem bauðst til að aðstoða bændur á Vesturlandi við heimaslátrun. Ritstjórn Ánastaða fannst þó að nær hefði verið að ræða við einn mesta reynslubolta landsins í þessum efnum, og var því fréttaritara út af örkinni og ræða við þann mann, sjálfann Slátrarann frá Hvolsvelli, en hann vill ekki láta síns rétta nafns getið.

Blaðamaður: Nú gerir út á hvelltamningar á sauðfé og hrossum, er mikil eftirspurn?

Slátrarinn: Já það er töluverð eftirspurn eftir þjónustu minni, sem kemur ekki á óvart þar sem árangur minn í hvelltamningum er 100% fram að þessu.

Blaðamaður: Hvað kostar hvelltamning nú til dags?

Slátrarinn: Ég læt nú yfirleitt duga að rukka í mat og drykk, og þá helst í heimaunnum drykk.

Blaðamaður: En nú eru dýrin ekki það eina sem drepst þegar slátrun á sér stað?

Slátrarinn: Nei ég á það til að rukka heldur mikið í drykkjarföngum sem veldur því að ég sjálfur hverf á braut úr þessum heimi það sem eftir lifir dagsins.

Við þökkum Slátraranum frá Hvolsvelli kærlega fyrir spjallið.

Þar til síðar

Þetta er svolítið fyndið

2007-11-06T13:09:00.000Z

Seldi hundakjöt sem lambakjöt

Kínverskur veitingastaður í Moskvu var með lambakjöt á matseðlinum en upp komst að þetta var í raun hundakjöt á diskum viðskiptavina sem bornir voru fram. Nú hafa forsvarsmenn staðarins verið kærðir fyrir að slátra hundum og selja kjötið sem lambakjöt.
Svindlið uppgötvaðist þegar kona ein tilkynnti til lögreglu að hún hafi orðið vitni að því að haldið hafi verið á stórum poka með einhverju lifandi og gólandi inn í eldhús veitingastaðarins að nóttu til. Lögreglan rannsakaði veitingastaðinn og það reyndist rétt að um hundakjöt var að ræða og að auki voru gæði kjötsins svo léleg að það var talið heilsuspillandi.

Heimild: www.bbl.is

Verkefni

2007-11-05T12:44:00.000Z

Það allra leiðinlegasta við verkefni er að það er alltaf ákveðinn skiladagur á þeim. Mun hentugra væri að hafa þetta svona fljótandi svo maður gæti bara gert verkefnin þegar andinn kæmi yfir mann og réttar aðstæður sköpuðust, en það verður nú líklega aldrei þannig.

Fór í partý heima hjá Flake, Allan og Zeko á laugardagskvöldið, og var það bara nokkuð gott. Ómar Ósmann a.k.a. Morten Pedersen var dólgur kvöldsins og veittist meðal annars gróflega að mér, og hafði í hótunum við Áskel sem slapp með naumindum við barsmíðar með því að biðjast vægðar.

Ef mig misminnir ekki eru þeir Danmerkurfarar að lenda í þessum töluðu orðum. Það á ég við Stefán frá Brautarholti, Jóhannes frá Þorleifsstöðum og Tobías í Úthlíð. Það stefndi víst í að laugardagskvöldið yrði kvöld kvöldanna, en hvort sú varð raunin skal ósagt látið.

Ég hef aðeins verið að glugga í bók sem ég keypti í kolaportinu um daginn, en hún fjallar um fyrstu 40 árin í sögu Sambands Íslenskra Samvinnufélaga, og datt í hug að koma með spurningar á næstunni tengt þeirri úrvalsbók. Mun ég hér með henda fram fyrstu spurningunni.

Nefnið eitt Kaupfélag sem bar heiti sem vísaði ekki til starfsvæðis þess og hvar það var staðsett, þ.e. ekki eins og t.d. Kaupfélag Skagfirðinga sem segir manni náttúrulega að starfsvæði þess er í Skagafirði.

Þar til síðar

Hreyfing á logninu

2007-10-25T12:38:00.000Z

Já það er sko búinn að vera hreyfing á logninu hér í Borgarfirði síðustu daga, en þetta hlýtur nú að lagast einhvern tímann.

Blakkur hennar Sóleyjar er að ná sér á strik eftir veikindi síðustu daga. Hann fékk veil fyrir hjartað en fór í hjartaþræðingu og ætti að fara að komast á götuna á ný. Það má segja að þau bæði séu að komast í gang því Sóley fór á eitthvað rosalegt líkamsræktarnámskeið um helgina þar sem fólki er kennt að hoppa, kýla og sparka. Hún var nú svolítið framlág eftir helgina en er að komast í sitt gamla form, held samt að ég sé nú ekki gerður fyrir svona því þetta sprikl hentar ekki mönnum sem kæmust í landsliðið í stirðleika.

Ég er að fara heim á morgun, eigum leik annað kvöld á Króknum og það verður víst einhver hátíð því Tindastóll er 100 ára, einmitt á morgun. Farið verður á langferðarbíl og spurning hvort maður grípi ekki í míkrafóninn og segi norðlenskar sveitasögur, þannig að æskilegt væri að fara Vatnsskarðið.

Jæja ég ætla að drífa mig í málmsuðu til Jóa Ellerts

Þar til síðar

Trú á sauðkindina og heilaga jómfrú

2007-10-22T09:22:00.000Z

Mánudagarnir eru til mæðu segir einhversstaðar, en fyrir mér eru allir dagar jafnir.

Eitthvað af vatni hefur runnið til sjávar síðan ég lét í mér heyra síðast. Jósefína er reyndar því miður ekki seld ennþá, en ég er nú búinn að komast í gegnum 2 lokapróf, vinna körfuboltaleik með bölvaðri heppni, þar sem ég var reyndar í hlutverki áhorfenda því ég fékk mína 5. villu þegar 6!! mínutur voru eftir af leiknum, fara í hlöðupartý þar sem ég fékk þann skemmtilega heiður að vera elsti maðurinn á svæðinu fyrst að Fúsi í Skrúð ílengdist ekki þar, og fara á kjördæmisþing hjá Framsóknarflokknum þar sem ég hitti Joe Spritt og fékk helstu fréttir úr Skagafirðinum.

Það er kominn nýr tengill inn á aðra bæi, en það er þau Víðir og Sibba tamningamenn Íslands nr. 1 sem hafa opnað heimasíðuna tamning.is, mér fannst nú skemmtilegast að skoða myndirnar af Víði þegar hann var ungur, sjálfsagt að láta sig dreyma um hamarsstuldi og eitthvað slíkt.

Þar til síðar

Skemmtilegur tími

2007-10-10T16:06:00.000Z

Það er svo leiðinlegt að lesa fyrir próf, að það er nauðsynlegt að pára eitthvað niður til að dreifa huganum. Fagið er Almenn Bútækni og þetta er svona tja... milliþurrt efni, en vissulega áhugavert á köflum. Held að það væri langbest að fá Jóa Ellerts til að semja prófið.

Annars datt mér í hug að svara einhverri spurningu í prófinu, á þá leið sem ég lærði af landsráðunautnum. ,,Best er að fá verktaka til að vinna verkið, nema að maður sé hræddur við að verktakinn kalli mann aumingja, þá er best að fá fátæka námsmenn og borga þeim með víni."

Hún Jósefína mín er nú til sölu. Tækninafn hennar er Volvo S40. Vélin er með 1.9l sprengirými og útbúin túrbínu, sögð skila 160 hestöflum. Hún er eki 178 þús. km. Jósefína stóðst skoðun nú á dögunum með glans (vantaði eitt parkljós, en það er komið í lag) og er nýsmurð. Hún er á 17 tommu felgum á nýjum Sava sumardekkjum og með fylgja 16 tommu goodyear nagladekk (keyp fyrir ári síðan) á álfelgum. Áhugasamir hafið samband í 860-2935

Þar til síðar

Hvítvín

2007-10-01T14:32:00.000Z

Góðann og blessaðann daginn

Löng og ströng helgi að baki, en samt góð. Hófst með ferð á föstudaginn norður í land í fararstjórn Magnúsar B. Jónssonar, þar sem skoðuð voru 4 mismunandi bú, fjárbúið Hjallaland í Vatnsdal, eggjabúið Efri-Mýrar í Refasveit, kúabúið Hlíðarenda í Óslandshlíð og loðdýrabúið að Syðra-Skörðugili á Langholti. Ég hafði nú gaman af því að koma inn í hæsnabú í fyrsta skipti í svona 15 ár og finna lyktina sem maður ólst upp við hér á árum áður. Eftir þessa ferð var svo brunað vestur og beint á æfingu.

En þetta var nú ekki síðasta ferðin mín í Skagafjörðinn þessa helgina, því á laugardagskvöldið kom Slátrarinn frá Hvolsvelli við í Múlakoti ásamt aðstoðarmönnum sínum (Einari og Sveini) og tók mig og Sóley með sér á Laufskálaréttarball, við vorum mætt í Fjörðinn um 11.30, beint á ball, og vorum farin um 10.30 morguninn eftir því ég þurfti að mæta á æfingu alltof snemma. Ballið var hins vegar bara nokkuð gott, hitti mikið af góðu fólki og meðal annars eina blómarós úr Blönduhlíðinni.

Það var gaman að heyra í gær þegar við komum í Borgarfjörðinn að Steingrímur sagði "jæja ætli maður þurfi ekki að læra eitthvað í dag" því hann átti að flyrtja fyrirlestur í almennri bútækni núna í dag, en svo endaði með því að ég þurfti að flytja minn fyrirlestur í dag, þrátt fyrir að hafa samkvæmt planinu átt að vera með hann á næsta miðvikudag, því skáldagyðjan hafði greinilega ekki heimsótt Steingím í gær.

En munið svo bara eitt börnin góð: Verum karlmenn - drekkum hvítvín

Þar til síðar

Húsbændur og hjú

2007-09-25T09:02:00.000Z

Já sælt veri fólkið

Er ekki réttast að hella úr viskubrunninum áður en ritgerðarsmíð um gæðastýringu í sauðfjárrækt heldur áfram.

Fór norður um þarsíðustu helgi að elta bolta sem gekk nú svona þokkalega, nema það að Hákon fékk boltann ekki nema einu sinni í andlitið í upphitun, og nota bene upphitanirnar voru fjórar þannig að þessi árangur er vissulega töluverð vonbrigði. Hápunktur ferðarinnar var þó þegar ég, Beigalda-skrímslið og Skeljabrekku-undrið tókum hring í Eyjafirðinum og stoppuðum í Garði til að skoða stærsta fjós landsins (eftir því sem Einar Örn a.k.a. Bílstjórinn segir). Var þar áð í þónokkurn tíma og spjallað við bændur og öll tæknin skoðuð, sem var alveg helvíti magnað. Svo héldum við nú áfram og keyrðum framhjá Grund í Eyjafirði og vorum að spá í að kaupa, en það stoppaði á því að mamma Land-Roversins vildi ekki skrifa upp á 400 milljón króna lán handa okkur.

Það kom svolítið skemmtilegt fyrir í Almennri Bútækni í gær. Grétar Einarsson var að halda fyrirlestur og allt í einu heyrði ég sekkjapípuspil, og hugsaði með mér "vel gert Birta" því ég hélt að hún hefði gleymt að taka hljóðið af tölvunni sinni. En eftir smá stund greip Einar Kári framm í fyrir Grétari og spurði "af hverju er maður að spila á sekkjapípu út á plani", ég leit út um gluggann og viti menn, á planinu stóð eldri maður og blés sitt allra besta í sekkjapípu og Björn Þorsteinsson stóð og hlustaði á. Hvað þessum manni gekk til er ekki ennþá vitað.

Hér að neðan er hægt að sjá nútíma fjósamanninn skafa flórinn í fjósinu í Garði.

Þar til síðar

Brettakantar

2007-09-19T09:24:00.000Z

Góðann daginn

Já Steingrímur er með einn brettakant á afturdekkinu á nýja hjólinu sínu, sem þýðir að þeir eru einum fleiri heldur en eru á trukknum. Skora á Óðin um að koma með vísu um brettakanta, reiðhjól og trukka.

Fór með Jósefínu í skoðun áðan og að sjálfsögðu rann hann í gegn. Var að spjalla við skoðunarmanninn og hann sagði mér að einu bílarnir sem hann sér í þessu starfi sem eru með fullkomlega jafnar bremsur eru gamlir Land-Roverar með bremsur í góðu lagi, sem útilokar að vísu Bakkus þeirra Langhyltinga.

Akureyrarferðin var ágæt, nema fyrir það að mig langaði ægilega mikið til að skilja bílinn eftir í Norðurárdalnum og fara að reka safnið niður í Silfrastaðarétt, hundleiðinlegt að missa af þessu. En ég náði nú að heilsa Kobba á Borgarhóli þannig að það var einhver sárabót. Ég er eiginlega búinn að ákveða það að ef ég verð í útlöndum næsta vetur þá ætla ég að fljúga heim í göngurnar.

Þar til síðar

Nautin þagna

2007-09-11T10:28:00.000Z

Ég varð bara að skrifa um þá merkilegur staðreynd að það er logn og blíða á Hvanneyri þennann morguninn. Nei það var nú ekki eina ástæðan, hin ástæðan var sú að ég hef ekkert að gera nema að bíða eftir að tími í almennri búfjárrækt hefjist. Sjarminn er ekki mættur, er sennilega að skrölta út á Bút á reiðhjólinu sem hann keypti sér í gær, já Steingrímur keypti sér hjól, hver hefði trúað því.

Það liggur fyrir ferð á hið fagra norðurland um helgina, nánar tiltekið á Akureyri. Það er eitthvað blessað æfingamót alla helgina, þannig að ég kemst ekki í göngur fyrir Stefán á Borgarhóli þetta árið. Verst að við skulum ekki fara í rútu, þannig að ég get ekki tekið að mér fararstjórn og kynnt Skagafjörð fyrir þessum útlendingum... "yes, here we have Þorleifsstaðir, were my good friend Joe Spritt works as a cow technician and head milker"

Ef einhverjum vantar miða á Jethro Tull á laugardaginn endilega hafa samband við mig.

Þar til síðar

Sama gamla

2007-08-30T15:07:00.000Z

Jú sælt veri fólkið

Fyrsti skóladagurinnn er að baki hjá mér, almenn bútækni hjá Grétari Einarssyni sem sagði okkur meðal annars frá því að það er betra að fá sér Pólverja heldur en mjaltaþjón, einfaldlega vegna þess að Pólverjinn getur málað á meðan hann er ekki að mjólka, en ekki mjaltaþjónninn. Vantaði sárlega Steingrím en hann var upptekinn við að vera á beit upp í Lundarreykjadal.

Hvanneyri skartar sínu fegursta þessa dagana, ausandi rigning og rok. Þannig að það er allt við það sama, sá áðan að trukkurinn er mættur með svörtu vængina sína, eða brettakantana eins og Steingrímur vill kalla það.

Síðasti föstudagur var ansi merkilegur, því hann var síðasti dagur minn sem sumrungur hjá Vegagerðinni. Það er hálf fáránlegt að hugsa út í það að ég er búinn að vera þarna meira og minna í sjö sumur. Ég ætla að koma með svona endurminningarblogg um þennann góða tíma þegar ég nenni.

Sóley er farin að kenna grunnskólanemendum í Borgarnesi, og ég hef tekið eftir því að hún talar um nánast sömu hlutina og Gamli Sólheimahundurinn gerir að vinnudegi loknum, en hvaða hlutir það eru skal ekki gefið upp hér. Ég hef reyndar áhyggjur af því að krakkarnir verði allir búnir að læra Múlakotsropið fyrir jól, en það borgar sig kannski ekki að vera svartsýnn.

Mínir hagir er aðeins öðruvísi nú en 2 síðastliðna vetur sökum þess að ég bý ekki núna á Hvanneyri heldur upp í Múlakoti, en þetta er nú örstutt og ekkert miðað við að keyra daglega frá Varmahlíð og út í úthverfið við ströndina.

Jæja, ég nenni þessu ekki lengur, ég er farinn heim.

Þar til síðar

Miðar áfram

2007-07-29T12:39:00.000Z

Heyrið þið gott fólk!!

Mig vantar nauðsynlega að losna við 2 flugmiða til Vestmannaeyja. Þessir flugmiðar eru frá Bakkaflugvelli kl. 7 á föstudagskvöld. Ef þið vitið um einhvern sem enn er farlaus út í eyjar endilega látið mig vita.

Þar til síðar

Kæri Svarfaðardalur

2007-07-18T20:10:00.000Z

Það voru nú liðnir ár og dagar síðan ég hafði fengið mér í aðra tánna 2 kvöld í röð, en það gerðist einmitt um helgina. Eins og sönnum unglingum sæmir kölluðu ég og Sóley til leiks á föstudaginn sökum þess að húsráðendur voru ekki heima. Það sem hefur líklega bjargað þeirri samkomu frá því að drepast úr leiðindum var það að bæði Hr. Tobías og Villi Special voru edrú og að keyra. En það skipti kannski ekki máli, þeirra leiðindi hefðu kannski bara verið dropi í hafið.

Á laugardagsmorguninn var svo rifið sig af stað og haldið í Svarfaðardalinn á henni Jósefínu. Íslandsmeistaramótið í hestaíþróttum var það sem heillaði, og Kalli á Grund var búinn að lofa okkur að veðrið yrði skaplegt. Ekki náðum við nú miklu af mótinu, en nógu miklu samt og fyrsti maðurinn sem ég sá eftir að hafa sest í einhverja þá bröttustu brekku sem ég hef séð var sjálfur Rúnar Númason. Ég og Sóley höfðum haft áhyggjur af því að það sæist vel á okkur að við hefðum verið að drekka kvöldið áður, en þær áhyggjur hurfu eins og dögg fyrir sólu er við sáum Rúnar. Um kvöldið var svo skemmtun með Erni Árna og Óskari í Álftagerði og var hún bara helvíti skemmtileg. Ballið var svona tja... já maður var allavega með vín við hönd þannig að það slapp.

Sunnudagurinnn var bara með betri þynnkudögum sem maður getur ímyndað sér, að sjálfsögðu fyrir utan þá þar sem þynnkan er drepin snögglega. Við fengum gistingu á Grund og eftir að Kalli hafði gefið okkur að borða þá dreif hann okkur í útsýnisrúnt um Svarfaðardalinn. Var gaman að sjá mörg falleg bú, en það skemmtilegasta var eggjasjálfsalinn sem var staðsettur við afleggjarann hjá einum bænum. Var hann þannig upp settur að þetta var trékassi með eggjabökkum og var ætlast til þess að fólk skildi bara tiltekna fjárhæð eftir í kassanum í staðinn fyrir bakkann sem það tæki. Kalli sagði okkur eftir rekstraraðilum eggjasjálfsalans að ferðalangar væru ótrúlega samviskusamir að skilja eftir rétta fjárhæð, enda fólk komið nógu langt frá Reykjavík og svik, prettir og eiginhagsmunasemi ekki lengur ríkjandi í hugum fólks eins og Sóley komst svo skemmtilega að orði.... hún sagði þetta kannski ekki nákvæmlega svona en mér fannst þessi andi svífa yfir orðum hennar.

Ég vil nota tækifærið og þakka Kalla vinnumanni á Grund fyrir höfðinglegar móttökur og Rúnari, sem ávallt mun heita Rúnar bóndi í mínum huga fyrir sprittið handa Sóley.

Efri mynd: Rúnar og Sóley hægra megin og Kalli vinstra megin við borðið.

Neðri mynd: Falleg mynd úr Svarfaðardal.

Þar til síðar.

Plöntugreining

2007-07-11T18:54:00.001Z

Mig vantar aðstoð við smávegis plöntugreiningu, og horfi þá aðallega til Steingríms sem útskrifaðs plöntugreiningarmanns.

Ég hallast að því að umrædd planta heiti loðgresi, en er þó ekki viss. Komment um þetta eru vinsamlegast þegin.

Sér Sprittar Spritt

2007-07-08T11:20:00.000Z

Mikið var nú gaman að bregða sér aðeins í bæinn í gærkvöldi og skoða stemninguna. Drengirnir mættu á svæðið á svarta drellinum og Joe Spritt var í beige-lituðum Elvis bol. Hann missti sig reyndar í einhverja hringavitleysu síðar um kvöldið. Villi Special var einstaklega leiðinlegur en þó vantaði eina góða rúllusögu til að toppa kvöldið.

Á eftir verður hún Jósefína gerð söluhæf þannig að það styttist í endalokin á okkar sambandi. Þessi bíll hefur reynst mér vel, en ef ég á að velja hápunkt sambands okkar, þá er það tvímælalaust þegar Villi Special nuddaði rófubeininu utan í Jósefínu. Ekki er ráðlegt að fara nánar út í það að svo stöddu.

Ég held að ég sé orðinn svolítið skemmdur eftir plöntunámskeiðið um daginn. Maður gerir varla annað en að góna niður fyrir sig ef verið er að ganga graslendi. Spurning um að færa sig yfir á malbikið til að hvíla hugann. Ég vil kynna, Hnappstör eða Carex Capitata, og mundu það Úlfhildur.

Þetta verður ekki lengra í bili, ég lofa að vera duglegri á næstunni að láta vita af mér.

Þar til síðar

Sveitapiltsins draumur

2007-06-06T07:21:00.000Z

God morgen mine dame og herrer

Danmerkurferðin var nú bara nokkuð góð, svolítið mikið verslað en ég ákvað að fá mér bjór fyrir hverja búð sem ég þurfti að fara í og hélst það ógnarjafnvægi bara nokkuð vel. Mikið var um Svía á svæðinu sökum landsleiksins á laugardeginum en ég þekkti ekki neinn af þeim, klikkaði á því að spyrja hvort einhver kannaðist ekki við Stefán Gísla: "Do you know Stefán, best graveman in Sweden?"

Fór í tjöru út í Fljót og á Siglufjörð í gær í hreyfingarlausu logni og sá þar skemmtilegann hest. Málið er að hann er leirljósskjóttur en fyrir nokkrum misserum dreymdi mig að ég hefði keypt leirljósskjóttan hest á 400.000 kr af honum Jóni í Mófelsstaðakoti (Mó-Fó) og kallað hann Nonna. Sem er fáránlegt þó væri ekki nema fyrir það að Jón í Mófó er ekki mikill hestamaður. Ég held ég setji mig í samband við eigandann og athuga hvort ég geti ekki eignast fyrsta valrétt að folaldi undan þessari hryssu ef það verður með þessum fallega lit.

Ég vil nota tækifærið og hrósa Helga Sæmundi fyrir að vera einstaklega ferskur þennann morguninn sem og aðra.

Þar til síðar

Ekki dauður enn..

2007-05-29T07:25:00.001Z

Nei Jón minn ég er ekki alveg dauður, en það styttist í það hjá mér eins og okkur öllum.

Er mættur í Skagafjörðinn, ég og Sóley fórum á Blakk norður yfir heiðar og fengum alvöru móttökur með ekta norðlensku vorhreti. Þetta fór nú eitthvað fyrir brjóstið á húsfreyjunni en þetta venst. Fór nú svo að við flúðum aftur í Borgarfjörðinn og fórum á tónleika með Dökkfjólubláum (e. Deep Purple)

Nei nú er Skúli að fara að setja okkur fyrir í vinnunni.

Þar til síðar

Slakur

2007-04-25T07:46:00.000Z

Rétt slapp við það að hafa ekki skrifað staf í mánuð. Ég segi nú bara eins og maðurinn ,,það er svo mikið að gera". Reyndar er það bölvuð lygi, meðan maður hefur tíma til að sofa 6-8 tíma á hverjum einasta degi getur maður ekki sagt með góðri samvisku að mikið sé að gera.

Skellti inn 2 nýjum linkum í landbúnaðinn, nýja bændablaðsvefnum og heimasíðu átaksverkefnisins beint frá býli (heimavinnsla- og sala afurða), sem ég verð að viðurkenna að ég er nokkuð spenntur fyrir, en hef því miður ekki enn komist á kynningarfund. Reyndar er ég gríðarlega svekktur að ekki skuli vera mynd af Slátraranum frá Hvolsvelli, a.k.a. Hvolsvallarbasi, a.k.a. Suðurlands-Sjarminn framan á bæklingnum um beint frá býli.

Svo verð ég að segja ykkur frá einu, þekki mann sem er að flytja í nýja götu og hefur með sér svolítið af bílum sem enn eru ekki komnir í sumarfötin (þ.e. númeraplötur), og um leið og fyrsti bíllinn kom voru nágrannarnir búnir að hringja á lögguna og kvarta yfir því að númerslausir bílar væru utan bílaplans, hvað er að spyr ég nú bara.

Þar til síðar.

Símatími

2007-03-26T15:19:00.000Z

Í tilefni þess að ég var að panta mér nýjan síma á netinu þá datt mér í hug að fara yfir glæsta sögu mína í meðhöndlun farsíma.

Fyrsti síminn sem ég fékk í mínar hendur var Ericson lánssími frá pabba en Hlunkur át loftnetið af honum. Sá fyrsti sem ég eignaðist var Nokia 6210 sem ég fékk í jólagjöf. Hann dugði nú ágætlega, en þurfti að vísu að fara í viðgerð 3 sinnum eftir ýmis högg og bank og man ég að Haukur Skúlason hafði einhvern tímann á orði að ég væri oftar með lánssíma úr símbúðinni heldur en minn eiginn síma. Einhverntímann var ég á balli í Sjallanum og týndi símanum en fann hann svo aftur og þá var skjárinn brotinn en ég setti glært límband yfir hann og endist hann í nokkurn tíma eftir það en hann gaf sig að lokum eftir að það hafði komist full mikil drulla meðfram límbandinu.

Þá var ákveðið að splæsa í 3510 og var það nú ágætis sími, nema það að eitt sinn þá lá ég í mestu makindum í sófanum í Víðimýrinni og setti símann ofan á brjóstkassann og fór svo að ég dottaði. Svo hringir blessaður síminn og ég sprett á fætur og síminn tekur flugið og lendir eitthvað harkalega og varð ekki samur upp frá því og endaði með því að hann dó. Reyndar fór hann einu sinni í viðgerð því á vordögum 2003 var ég að þökuleggja fótboltavöllinn heima og það gerði svo mikið moldrok að hann fylltist af drullu og varð ónothæfur.

Ég og Litli-Per vorum einu sinni í ruslatínslu út á Siglufjarðarskriðum og þá fann Per Nokia 6150 sem pabbi notaði í nokkra mánuði en ég tók til við að nota hann eftir að 3510 síminn gafst upp. En svo um sumarið 2004 keypti ég mér Nokia 3200. Hann endist nú ágætlega, varð fljótt drullugur eftir Vegagerðarvinnuna, titrarinn var hættur að virka en gerði sitt gagn. Svo á síðastliðnu Landsmóti Hestamanna þá tókst mér að týna honum og hafði hann þar með lokið þjónustu sinni.

Þá var fjárfest í Nokia 5140 sem keyptur var í Kaupfélaginu. Þetta var svona "iðnaðarmannasími" sem átti nú að þola ýmislegt en mér tókst að finna eitt sem hann þoldi ekki alveg. Á mjólkurbílstjórabuxunum er sérstakur vasi aftan á sem gerður er fyrir síma. Og svo var komið að því að þvo buxurnar og þá tók ég ekki eftir því að síminn var í símavasanum og hann fór með. Var nothæfur eftir þvottinn en hljóðið var að detta inn og út og svo endaði með því að 4-5-6 takkarnir hættu að virka og gafst ég þá upp. En í millitíðinni hafði gamli 3200 fundist og verið sendur til mín og gat ég þá notað hann. Allt þar til að ég þurfti að henda í þvottavélina og hélt á honum í hendinni sem hélt undir fatahrúguna og þegar ég henti hrúgunni inn í þvottavélina þá fékk sá gamli að fljóta með en hann lifði þvottinn alls ekki af.

Því hef ég notast við Ericsson garm sem hún Anna Heiða mágkona mín lánaði mér en þetta horfir nú allt til betri vegar þar sem í lok vikunnar ætti ég að vera kominn með svona Bluetooth Nokia síma með þráðlausu heyrnatóli, svona eins og alvöru atvinnubílstjórar.

Þar til síðar

Syngur bassa í karlakór

2007-03-19T12:10:00.000Z

Fékk miklar sorgarfréttir um daginn, tónleikar með Heimismönnum og ball með sjálfum fjármálastjóra Kaupfélagsins sem áttu að vera í lok þessa mánaðar í Logalandi í Reykholtsdal féllu niður. Sem er miður því þetta hefði bara verið snilld.

Ég vil nota tækifærið og óska Þorbergi og frú til hamingju með strákinn, kenningin mín um að barnið yrði stúlka stóðst ekki og það er kannski ágætt.

Ég var beðinn að skila því til Unnsteins að ræða bara við Baldur Björnsson ef honum langar að sjá myndasýningu með húsfreyjunni, ég held að hann viti símanúmerið.

Bætti inn nokkrum myndum af bleika herberginu hans Steingríms.

Þar til síðar

Sæll Steingrímur

2007-03-15T09:04:00.000Z

Vildi bara nota tækifærið og þakka honum Steingrími kærlega fyrir kveðjuna sem hann sendi mér í gegnum heimilissímann í Múlakoti í nótt. Jónína bað mig að skila því til þín að þú værir sennilega ekki hástökkvari vikunnar á vinsældalistanum þessa vikuna. En sem sárabót færðu mynd af þér Steingrímur minn.

Ég giska á að Hvolsvallarbasi verði álíka ferskur þegar hann vaknar á eftir eins og hann er á þessari mynd.

Þar til síðar

Breytingar

2007-03-14T12:06:00.000Z

Loksins græjaði ég þetta með slideshowið þarna hægra megin. Setti ekki texta með myndunum því það tók allt of mikið pláss. Fékk 2 myndir lánaðar hjá Höllu Kjartans af Ingimari á Flugumýri og nærmynd af Robbanum á Kúskerpi, og þakka henni kærlega fyrir það. Er síðan hættur með vinnukonurnar, allt of mikið vesen að vera uppfæra þetta og svo er líka komin húsfreyja á Ánastaði þannig að engin þörf er á vinnukonum lengur.

Þar til síðar

Kæri Egill

2007-03-13T12:25:00.000Z

Las pistil Egils Helgasonar þar sem hann er eitthvað að belgja sig yfir niðurstöðum könnunar BÍ sem hægt er að skoða hér neðar og í Eldri Mjöltum. Fyrstu setningar pistilsins lýsa greinilegri gremju yfir því að það sé til fólk hér á landi sem líkar vel að búa hér og telur þá samfélagssamsetningu sem við höldum í heiðri, sé af hinu góða.

Egill kemur inn á að stuðningur við landbúnaðarafurðir sé hvergi hærri en hér á landi, en sem dæmi má nefna að í þeim reiknistuðli sem notaður er til þess að bera stuðning saman milli þjóða er ýmislegt ekki tekið inn í sem aðrar Evrópuþjóðir nota sér til að styrkja sinn landbúnað, sem skekkir niðurstöðurnar okkur í óhag. Ég verð að viðurkenna að ég man ekki hvað stuðullinn heitir en bendi þá á Harald Benidiktsson frá Vestri-Reyn.

Svo tekur Egill við að moka yfir landbúnaðarafurðirnar og nefnir þar fyrst nautakjötið. Ef hann hefði hundsvit á málinu vissi hann það að íslenski kúastofninn er ekki best til þess fallinn að nota til kjötframleiðslu, og hefur það verið mjög erfitt fyrir bændur að ætla að koma sér upp almennilegum stofnum sökum þess að nautakjötsframleiðsla hefur ekki notið styrkja í gegnum tíðina, sem hefur gert mönnum mjög erfitt að sérhæfa sig í þeirri búgrein.
Á fyrri hluta síðasta árs gerðist það að ráðamenn í Argentínu íhuguðu það alvarlega að minnka útflutning á nautakjöti þaðan til muna til að geta séð sínum eigin innanlandsmarkaði fyrir kjöti. Þetta olli ólgu í Danmörku og ég spyr hvað myndum við gera í slíkri stöðu ef við værum háð þessum aðilum.

Ég veit nú ekki betur en að íslenskir ostar hafi bara þótt nokkuð góðir, og þekki einn mann sem búsettur er í Danmörku sem er ekki í miklum vafa um hvora framleiðsluna hann myndi velja.

Svo fer greyið með mikla rangfærslu þegar hann segir að ekki sé hægt að kaupa afurðir beint af bændum. Sláturfélag Austarlands hefur í um 5 ár starfrækt vefinn austurlamb.is þar sem maður getur keypt lambakjöt beint af nokkrum bændum á austurlandi.

Agli líður greinilega vel í 101 Rvk. Honum líður vel svo lengi sem hann hefur internetið og geti pantað sér flugfar á icelandair.is til framandi landa. Það er mjög gaman að sjá hversu mikið í pirrurnar á honum það fer að til í landinu sé fólk sem vill skilgreina sig sem Íslendinga út frá sínum eigin forsendum, út frá sinni eigin sögu, út frá sinni eigin þjóðarsál og út frá sínu eigin landi. Hann er kannski bara einn af þeim sem vill skilgreina bændur sem fólk sem klæðir sig upp í lopann og gúmmískóna og fer upp á veg og veifar túristunum þegar það heyrir í bíl, ja maður spyr sig.

Þar til síðar.

Til hamingju með daginn

2007-03-11T13:23:00.000Z

Vildi bara nota tækifærið og óska honum Friðriki Bjarnasyni nokkrum kærlega til hamingju með afmælið.

Þar til síðar

Bændur rúl(l)a!!

2007-03-06T20:46:00.000Z

Mikið voru nú niðurstöður könnunar Capacent fyrir Bændasamtök Íslands ánægjulegar fyrir mig og mína.

Helstu niðurstöður könnunarinnar eru:

79% telja að bændur beri litla eða enga ábyrgð á háu matarverði hér á landi.

74,7% sögðu gæði innlendra landbúnaðarvara meiri en erlendra. 2,3% töldu gæði innlendra landbúnaðarvara minni en erlendra.

93,8% svarenda telja að það skipti miklu máli að landbúnaður verði stundaður hér á landi til framtíðar.

79,9% telja að það skipti miklu máli að Íslendingar séu ekki öðrum háðir um landbúnaðarafurðir.

61,8% aðspurðra eru tilbúnir til að greiða hærra verð fyrir íslenskar en innfluttar landbúnaðarvörur.

Sérdeilis prýðilegt já já....

Svo var ég að heyra það að ástæðan fyrir því að Bónus gat boðið upp á "virðisaukaskattslækkun" fyrir 1. mars var sú að þeir píndu byrgjana til að lækka verðið áður en aðgerðir stjórnvalda komu til framkvæmdar, það er ekki að spyrja að þessum mörðum.

Þar til síðar

Til hamingju með daginn

2007-03-01T12:02:00.000Z

Þennann dag fyrir 94 árum fæddist í Stórholti í Fljótum í Skagafirði sjálfur Ólafur Jóhannesson sem síðar varð formaður Framsóknarflokksins, forsætisráðherra og gegndi ýmsum trúnaðarstörfum fyrir Sambandið. Skál fyrir því

Er finnska erfið?

2007-02-27T16:17:00.000Z

Góðann daginn ágætu samvinnumenn.

Gluggaði í hið ágæta rit Lifandi Vísindi um daginn og þar var lítil klausa um að þegar fólk eldist virkar oft sem það verði full hreinskilið á stundum og allt að dónalegt, og að það eigi sér eðlilegar skýringar því það gerist eitthvað í fremra heilablaði eða eitthvað álíka. Mér datt strax í hug ferðin góða á elliheimilið á Húsavík og hann Leifur gamli sem reif kjaft við hjúkkurnar og barði stafnum sínum í borðið.

Óðinn Gíslason gaf mér merkilegar bækur í afmælisgjöf, og hef ég aðeins gluggaði í eina sem heitir Sammvinnurit og var skrifuð af Jóni Sigurðssyni frá Yztafelli árið 1945 þar sem hann fer yfir sögu samvinnufélaga í norðurhluta Evrópu og byrjar kaflann um finnska sambandið skemmtilega. "Fyrsta samband finnskra kaupfélaga var stofnað 1904, og hafði það finnskt nafn, sem varla verður skrifað með íslenzkum höndum, hvað þá framborið af íslenzkum vörum, en það var skammstafað S.O.K."

Annars er lítið að gera, lærdómur fyrir próf, körfuboltinn, steinullartínsla hjá Baldri Björnssyni ehf. og Framsóknarflokkurinn eiga hug minn þessa dagana.

Þar til síðar

Blót

2007-02-20T17:22:00.000Z

Já það var ekki laust við að einn eða tveir mættu á þorrablót Akrahrepps, Seyluhrepps, Skarðshrepps og Lýtingsstaðahrepps. Þetta var bara mjög gaman þó að sjálfsögðu hefði verið betra að hafa þetta í Miðgarði, en því var bara ekki að skipta þetta árið. Man að ég var með fyllerísröfl við mjög marga en man í fæstum tilfellum um hvað, þó man ég að ég og Snæbjörn (a.k.a Aumingjans kallinn) ætluðum að vekja pabba og það að ég tók dágóðann tíma í að ræða samvinnustefnuna við Litla-Per.

Ég gerðist svo magnaður að muna eftir því að kafa í gömlu myndaalbúmin og taka með mér nokkrar myndir sem komnar eru inn á netið, og fleiri bætast við seinna meir.

Þar til síðar

Mjólka vill flytja framleiðslu sína í Borgarnes

2007-02-14T13:39:00.000Z

Forráðamenn fyrirtækisins Mjólku hafa sýnt áhuga á því að flytja vinnslustarfsemi fyrirtækisins í Borgarnes. Verið er meðal annars að skoða húsnæðið sem Borgarplast var í að Sólbakka með staðsetingu í huga. Að sögn Sigurðar Óla Ólasonar, stjórnarformanns í Mjólku er vinnslan búin að sprengja utan af sér það húsnæði sem hún er núna í að Vagnhöfða í Reykjavík, svo það er farið að há framleiðslugetu fyrirtækisins, enda hefur starfsemin gengið vel, að sögn Sigurðar Óla. Vilji er fyrir því innan fyrirtækisins að færa vinnsluna nær framleiðslunni, þ.e. bændum og því sé ekkert síðri kostur að flytja hana í Borgarnes ef um semst.

„Ég tel að þetta yrði stórt og gæfuríkt spor fyrir alla ef af þessu verður,” heldur Sigurður Óli áfram. „10-14 störf myndu í upphafi fylgja með vinnslunni, þótt sala og dreifing yrði líklega áfram í Reykjavík. Mörg fyrirtæki í Reykjavík hafa einnig sýnt áhuga á því að fara í samstarf eða samvinnu við Mjólku en um slíkt hefur engin ákvörðun verið tekin. Kostnaður er gífurlegur við að flytja svona starfsemi, hvert sem hún fer. Þetta er því ekki einungis háð því hvað við viljum, velvilja Borgarbyggðar þarf einnig til. Engin ákvörðun liggur fyrir en ef af þessum hugmyndum verður myndum við flytja á næstu mánuðum,” sagði Sigurður Óli að lokum.

Heimild: www.skessuhorn.is

Svona fór um sjóferð þá

2007-02-13T15:49:00.000Z

Já fínasta helgi í Skagafirðinum afstaðin. Skrapp í Skörðugil og Kúskerpi með Hvanneyringum á laugardeginum, en missti því miður af því að sjá þegar Sjarminn stangaði Atla á Hofdölum í bringuna. Sem betur fer náðist ljósmynd af atburðinum.

Sæll Atli

Heimferðin eftir leik á sunnudagskvöldið var óneitanlega skemmtileg. Óðinn, Steingrímur og Einar Kári sátu í afturhluta Skúrdósins og sáu um skemmtiatriði fyrir mig og Sóley..... eða já Óðinn og Einar sáu skemmtiatriði fyrir mig. Legg það til við Óðinn að þegar/ef hann klárar námið einhvern tímann þá geti hann sett upp heilsubæli á Vöglum og læknað fólk af kynvilla og grænmetisfíkn.

Vil þakka öllum þeim sem óskuðu mér til hamingju með afmælið á sunnudaginn, sérstaklega þeim sem sungu fyrir mig á leiknum um kvöldið, en þar var tríóið Skratti sjarmerandi Larfur fremst í flokki og gaman að heyra að röddin á Skrattanum komst í Landsmótsfílinginn.

Þar til síðar

Ja nú gerist það

2007-02-08T18:28:00.000Z

Er ekki kominn tími á nokkur vel valin orð af minni hálfu.

Eftir mikla ládeyðu það sem af er árinu horfa hlutirnir upp til himins og sjá sólina bera við Skeljabrekkufjallið. Ástæðan fyrir bjartri framtíð minni er sú að ég er á leiðinni heim um helgina..... vá það hefur nú gerst lengi. Því miður á nú ekki eftir að bera á því að ég labbi á pöbbin, líti inn um stund og kíki aðeins í glas, það verður bara seinna. Þetta verður nú að mestu leyti rólegheitaheimsókn fyrir utan það að á laugardeginum verða Hvanneyringar í búfjárræktarferð í Skagafirðinum og meiningin var að slást í för með þeim og skreppa á eins og einn eða 2 bæi. Hápunkturinn verður að sjálfsögðu þegar fólkið á Kúskerpi (jájá) verður heimsótt og fjósið skoðað, sem verður nú líklega bara yfirskin eins og svo oft áður í svona ferðum.

Þar til síðar

Þú færð kraft....

2007-01-31T17:22:00.000Z

Það gladdi mitt litla hjarta þegar ég sá í morgun á heimasíðu bandarískra mjólkurframleiðenda að samkvæmt rannsóknum vísindamanna við háskólann í Indiana, þá er kókómjólk mun betri sem næringargjafi eftir stífar íþróttaæfingar, heldur en svokallaðir íþróttadrykkir, t.d. Gatorade og Powerade. "Einstök samsetning af kalki, próteinum og kolvetnum í Kókómjólk (e. chocolate milk) veitir þá orku og næringu sem þarf til að styrkja bein, byggja upp vöðvafrumur og jafna sig eftir átök." (www.gotmilk.com)

Þar hafið þið það

Þar til síðar

Vísnaþáttur nr. 1

2007-01-24T12:06:00.000Z

Heilir og sælir lesendur góðir.

Ég ætla að fara af stað með vísnaþætti, svona bara af og til, og vil ég hvetja ykkur til að senda mér vísur eftir ykkur eða bara vísur sem ykkur líkar vel við á póstfangið vegagerdin@hotmail.com

Fyrsta vísan er eftir sjálfann Óðinn Gíslason frá Vöglum, og var samin um Agnar á Miklabæ þegar Óðinn var í 10. bekk í Varmahlíðarskóla. Ég er reyndar ekki viss um fyrstu línuna, en Óðinn leiðréttir mig þá bara.

Eitt ég skilið illa fæ,
er það skynjun geggjuð.
Að Maddaman á Miklabæ,
er merkilega skeggjuð.

Fyrir skemmstu voru haldnir tónleikar í Reykholtskirkju, þar sem 2 bræður á Arnarstapa á Mýrum sungu, og fór það fyrir brjóstið á prestum er voru þar staddir, þegar þeir sungu lagið "Sagan af Jesú" eftir þá Baggalútsmenn. Í einni mjólkurferðinni á Mýrunum rakst ég á í einu mjólkurhúsinu vísu um atvikið.

Guðsmennirnir gengu út,
af geðshræringu svitna.
Er bræðurnir í Baggalút,
bljúgir tóku að vitna.

Og í lokin fylgir ein góð eftir Sigurð Breiðfjörð.

Detta úr lofti dropar stórir,
dygnar um í sveitinni.
Tvisvar sinnum tveir eru fjórir,
taktu í horn á geitinni.

Þar til síðar